OUDTSHOORN NUUS - Die eienaars van Latana Cheese, Dean en Petra Lategan, kan voorwaar trots wees op hulself nadat Latana se jogurtballe as die beste jogurthappie in die land aangewys is.
Hulle het die goue toekenning op 27 April tydens die Agri-Expo Qualité-toekennings in die Kaap ontvang. Die jogurtballe word met kruie en knoffel gegeur en in olyfolie ingelê.
Hierdie toekenning bewys weereens dat klein familiebesighede in die Klein-Karoo nie 'n treë terugstaan vir groter besighede en vervaardigers nie.
Latana Cheese is by Matjiesrivier geleë en is vier jaar gelede deur die Lategans begin.
By die 2016 suiwelkampioenskap het Latana ook weggestap met bronstoekenning vir hulle Boerenkaas. By die kampioenskap moes Latana teen 85 ander vervaardigers meeding en daar was byna 900 inskrywings in die verskillende afdelings.
Toekennings is nie iets nuuts vir Latana nie aangesien hulle ook in 2014 en 2015 met verskeie toekennings bekroon is.
Die Oudtshoorn Courant het 'n paar vrae aan Dean gestel om uit te vind wat hierdie klein onderneming so suksesvol maak:
Ek het op Oudtshoorn grootgeword en skool gegaan op Matjiesrivier, na matriek het ek gestudeer aan Oudtshoorn Onderwyskollege en daarna onderwys gegee vir 10 jaar, Verder gaan studeer aan US maar Grieks was 'n kuns en moes opgee. Terwyl ek aan US studeer het ek my verdienste aangevul deur die eerste Rekenaargesteunde opleidingsentrum is Suid-Afrika daar te begin.
Ek beland toe in die rekenaarwêreld en doen die laaste 10 jaar van my beroepslewe verkiesings in Afrika. In 2008 word my vrou gediagnoseer met borskanker en in 'n gesprek eendag sê sy dat dit lekker sal wees om kaas te maak, ek sê kom ons doen dit en 2010 skryf ons in by LNR op Irene vir 'n kursus.
Ons het 2011 afgetree na baie jare in Afrika en het plaas toe verhuis waar ek met kaas begin eksperimenteer het. Vriende het my aangespoor om meer te maak en ek het 'n klein kaaskamertjie gebou 3 x 4 meter. In 2012 begin ons kaas maak, sonder 'n mark, maar met baie geloof.
Ons eerste bemarkingspoging was om 120 briewe aan gastehuise, hotelle en restaurante te stuur. Ses het geantwoord en vyf het genoeg kaas bestel vir ons om te begin groei. Jamstreet se markie het ons produkte laat bekend word en al meer van Oudtshoorn se publiek het ons begin ondersteun.
Daardie ondersteuning het ons gedryf om die beste kaas te probeer maak.
In 2014 word ons raakgesien deur Breyton Milford van Agri-expo en oorreed om deel te neem aan die World Jersey Cheese Championships, ons kon nie voorberei nie, want ons het die Maandag gehoor ons is toegelaat om laat in te skryf en die Woensdag moes ons kaas in Kaapstad wees.
Ek het bloot in die koelkamer ingestap, gekyk watter kaas is gereed, dit gepak, Oudtshoorn toe gery en Postnet die dood voor die oë gesweer as die kaas laat is in Kaapstad.
Ons was die jongste en kleinste kaasmakers en ons het twee silwer- en drie bronsmedaljes gewen uit die sewe soorte kaas wat ons ingeskryf het. Dit was 'n ongelooflike ervaring. Verlede jaar 2015 het ons die eerste keer aan die Suid Afrikaanse kaaskampioenskappe deelgeneem en het ons swaar getrek teen die SA span want ons koeie se melk is te romerig vir die klasse waarin ons deelgeneem het, maar ons het steeds 'n bronsmedalje gekry.
Hierdie toekenning maak die mark vir ons oop om saam met die groot spelers in die mark ons produk te bemark. Ons mag vir die volgende jaar ons produk bemark onder die etiket "Suid Afrikaanse Kampioen Produk"
Hierdie toekennings beteken vir my en vir Ashley-Ann, wat ek as kaasmaker opgelei het, geweldig baie. Dit is 'n beloning op harde werk en dit maak ook vir Ashley-Anne 'n pad oop om in Frankryk as kaasmaker te gaan studeer.
Ons wil graag ons fabriek vergroot en groter koelkamers bou om meer kaas te verouder vir die groot aanvraag wat daar uit die stede is. Ons is besig met bemagtiging vir die werkers sodat hulle die werk kan voortsit as ons twee nou regtig moet stoep toe trek.
Ons wil graag aan ons verbruikers die liefde vir goeie kaas oordra. En die grootste uitdaging is om die gehalte en smaak wat ons vir onsself gestel het elke keer weer te behaal.
Op die oomblik is ons net vier. Petra, doen bemarking, kaas onthaal en aflewering, Anthia is verantwoordelik vir die skoonmaak en hulp by die kaasmaak. Ashley-Ann is ons assistent kaasmaker en ek is kaasmaker, admin, bemarking en produkontwikkeling.
'Ons bring jou die nuutste Oudtshoorn, Klein Karoo nuus'
