OUDTSHOORN NUUS - Die Wes-Kaapse polisie het op Vrydag 18 Oktober, 1 013 nuwe konstabels in hul geledere verwelkom.
Altesaam 453 konstabels het tydens 'n spesiale parade by die De Jager-sportterrein in Oudtshoorn uitpasseer.
Die geleentheid is bygewoon deur hooggeplaastes vanuit die polisie, insluitende die nuwe stasiebevelvoerder van Oudtshoorn, brig. Avril Kriga, die Oudtshoorn-burgemeester Johan Allers, onderburgemeester Zoë Tyatya, asook genooide gaste en familie van die konstabels.
Die uitpassering het deel gevorm van die polisie se 10 000-polisie-werwingsveldtog.
Hierdie polisiebeamptes, wat na verskeie polisiestasies in en om die Wes-Kaap ontplooi gaan word, is die laaste groep polisiebeamptes wat as deel van die projek opgelei is. Heelwat van die nuwe konstabels het in Desember 2023 gegradueer en is reeds ontplooi by polisiestasies regoor die land en om die Openbare Orde Polisie-eenheid (POP's) te versterk.
Die ontplooiing van hierdie konstabels is noodsaaklik om die polisie se vermoë om misdaad te bekamp te versterk, nuwe misdaadtendense aan te spreek en oplewings van oues aan te pak.
Almal is gegradueerdes wat in besit is van ten minste 'n NKR vlak 6-kwalifikasie en na 'n streng proses by die polisie gewerf is. Hulle het gegradueer uit verskeie akademiese dissiplines insluitend regte, polisiëring, forensiese wetenskap, inligtingstegnologie, openbare bestuur en baie ander studierigtings.
Die opleiding van hierdie nuwe konstabels is deel van ons regering se pogings om die polisie te versterk en polisiesigbaarheid in alle gemeenskappe te verbeter, asook om misdaadbekampingsinisiatiewe te bevorder.
Die tweede groep van die 2024 Projek 10 000-polisiewerwingsveldtog ondergaan tans hul opleiding en sal in Desember uitpasseer.
‘Ons bring jou die nuutste Tuinroete, Hessequa, Karoo nuus’
