Gewilde bewaarder en rolmodel ter ruste gelê

OUDTSHOORN NUUS - "Hy was 'n geweldige groot bate vir korrektiewe dienste, nie net op Oudtshoorn en in die Suid-Kaap nie, maar ook landwyd."

So het die Suid-Kaapse areakommissaris van die departement korrektiewe dienste, Noileka Booi, by bewaarders bekend as "Mama Booi", Saterdag hier in die Oudtshoorn Independente Kerk in haar huldeblyk vir die ontslape Jan (Thys) Olckers (43) wat op 15 Januarie in 'n motorongeluk omgekom het, gesê.

"Vir Thys was sy werk 'n roeping wat hy met passie uitgevoer het. Hy was 'n rolmodel vir almal, ook sy kollegas, wat veral alles ingesit het om jongmense in die gevangenis te help. Sy bydrae tot korrektiewe dienste is onbeskryflik en sy dissipline onberispelik. Hy was altyd betyds vir sy werk en daaroor aangespreek nie."

Olckers se vasberadenheid om 'n lid van korrektiewe dienste te word, word weerspieël deur die feit dat hy altesaam vyftien aansoeke ingedien het voordat hy as lid aanvaar is.

Hy was verantwoordelik vir die administratiewe aspek ten opsigte van die vrylating van gevangenes en het in sy ses jaar nooit 'n fout begaan nie.

Hy is om die rede al twee keer as beste bewaarder op Oudtshoorn aangewys.

Volgens ds. Ebraimilde Booysen van die Volkskerk van Afrika, Kimberley, was Olckers iemand wat respek afgedwing het op wie sy ma, vrou en familie met reg trots kan wees. Toe hy destyds by Klein Karoo Internasionaal gewerk het, het buitelanders met groot respek van hom gepraat.

"Kom ons koester Olckie van Norah Pottstraat se mooi herinneringe," het Booysen gesê.

Anthony Ewerts, ANC-raadslid van Kannaland, het Olckers as 'n nederige mens en steunpilaar beskryf.

"Hy het oral 'n impak op mense se lewens gemaak," het Ewerts in sy huldeblyk gesê.

"Hy was 'n gesinsman honderd en allemansvriend."

Olckers het op Maandag 15 Februarie gesterf toe die paneelwa waarmee hy en 'n kollega met 'n gevangene op pad was na Beaufort-Wes, die pad verlaat en gerol het. Sy kollega en die gevangene is net lig beseer.

Die ongeluk het sowat 40 km voor Beaufort-Wes gebeur.

Hy word oorleef deur sy vrou, Geraldine en twee seuns Damian (7) en Jumarco (12).

Klik hier vir vorige artikels: