OUDTSHOORN NUUS - John en Yvette van Oudtshoorn (hulle van) het onlangs die Klein-Karoo vir ’n besondere rede besoek: ’n DNS-toets het onthul dat John ’n direkte afstammeling is van Baron Pieter van Reede van Oudtshoorn, na wie die dorp vernoem is.

Baron Pieter van Reede van Oudtshoorn (1714–1773) was ’n senior amptenaar en is in 1772 as goewerneur van die Kaapkolonie aangewys. Hy het egter gesterf terwyl hy op pad was na die Kaap om sy pos in te neem. 

Sy nagedagtenis leef voort in die naam van die Wes-Kaapse dorp Oudtshoorn, asook in die familiegeskiedenis van John van Oudtshoorn, wat nou as die sewende geslag van die baron geïdentifiseer is.

John, wat tans saam met sy vrou in Frankryk woon, vertel sy vrou het vir hom ’n DNS-toets wat sy herkoms bepaal, vir sy verjaarsdag gekoop. “Ek het nooit regtig gewonder oor my herkoms nie, maar ek het niks gehad om te verloor nie. Dit was ’n groot verrassing om te sien waar ek vandaan kom.”

Hy verduidelik verder dat sy oupa besluit het om die "Van Reede"-deel van die van te verwyder, aangesien dit te lank geraak het.

“Ek is dus die derde geslag Van Oudtshoorns.”

Hoewel hy in Virginia in die Vrystaat grootgeword het en gereeld vakansies aan die Tuinroete deurgebring het, het hy nooit geweet van sy familie se historiese verbintenis met Oudtshoorn nie.

Toe hulle hul besoek aan Suid-Afrika beplan het, het John en Yvette besluit om Oudtshoorn te verken.

“Ek het vir die eerste keer opgemerk hoeveel keer Baron van Reede se naam in die dorp verskyn. Ons het gesien daar is ’n gastehuis genaamd 88 Baron Van Reede Gastehuis, en ons moes natuurlik daar bly. Ons was nogal verbaas toe ons uitvind dat die gastehuis in Baron van Reedestraat is.”

John sê sy perspektief oor die dorp het verander ná hierdie ontdekking.

“Die mense hier is ongelooflik vriendelik, en die gidse wat ons ontmoet het, was fantasties. Hulle deel soveel interessante feite oor die dorp en sy mense. Dit was ’n onvergeetlike ervaring.”

‘Ons bring jou die nuutste Tuinroete, Hessequa, Karoo nuus’