Derde moord vir Maart

OUDTSHOORN NUUS - Die Oudtshoorn-polisie het die week hul kommer oor die hoeveelheid moorde en aanrandings in Oudtshoorn uitgespreek.

Dit volg na 'n derde moord die maand in Oudtshoorn gepleeg is.

Jan Tiemie (60), is Vrydagaand, vir klaarblyklik geen rede, op die hoek van Schilder- en Roussouwstraat deur 'n 14-jarige met 'n mes in sy bors gesteek.

Volgens Tiemie se suster, Abigail Oktober, het Tiemie die aand van die kerk af huis toe geloop.

"Die polisie het my Vrydagaand kom wakker maak om vir my te sê my broer is dood. Die kinders het glo op die hoek sit en rook toe een opspring en Jan in die bors steek. Hy is net 14 jaar oud. Hy moes vir Jan geken het, want hy bly naby ons.

Ek verstaan nie hoekom hy so iets sou doen nie - hy is dan nog so jonk," het 'n steeds verslae Oktober aan die Oudtshoorn Courant gesê.

Oktober sê die feit dat die kinders van so 'n jong ouderdom af begin misdade pleeg is vir haar uiters kommerwekkend.

"Kinders gebruik dwelms en ouers laat dit toe. Hulle het geen respek vir ouer mense nie."

Volgens haar het haar broer nog nooit iemand leed aangedoen nie en was hy nie 'n bakleierige mens nie.

"Ons pastoor het my na sy dood kom sien en my vertel dat Jan die aand van sy dood sy hart vir die Here gegee het. Nou weet ons ten minste hy is op 'n goeie manier Hemel toe."

Volgens haar het Tiemie nie 'n vrou of kinders gehad nie en word hy oorleef deur sy vyf susters en 'n broer.

Hy word volgende Saterdag (26 Maart) begrawe. Die diens begin om 10:00 by sy huis in 15de Laan en om 11:00 uit die Christelike Herlewing Kerk.

Kapt. Louis Visser, woordvoerder van die Oudtshoorn-polisie sê, die 14-jarige is Sondagmiddag gearresteer en het Maandag in die hof op aanklag van moord verskyn.

Volgens Visser is gewelddadige optrede besig om al hoe meer toe te neem en is dit duidelik merkbaar dat mense al hoe meer onverdraagsaam raak en dat die morele standaard agteruitgaan.

"Nog iets wat uiters kommerwekkend is, is die ouderdom van die beskuldigdes in die sake. Dit wil voorkom of ouers nie meer hulle plig as ouers nakom nie," het hy gesê.

Visser het bygevoeg dat dit ook kommerwekkend is oor hoe baie aanrandings dié maand aangemeld is en in hoe baie van daardie gevalle messe gebruik is.

"Daar is reeds 13 persone die maand vir besit van gevaarlike wapens gearresteer, maar ons gaan definitief meer fokus plaas op die deursoek van mense wat moontlik gevaarlike wapens by hulle het."

Volgens hom is die verdagtes in al drie moordsake vining gearresteer deur middel van die publiek se hulp en samewerking.

"Ons bedank almal vir hulle bydrae tot die arrestasies. Sonder die publiek se oë en ore is ons hande afgekap," aldus Brigadier Levona Januarie, Oudtshoorn se stasiebevelvoerder gesê.

Die polisie wil ook die publiek vra om betrokke te raak by straatkommitees en buurtwagte.

"In Oudtshoorn-Noord is 'n baie aktiewe buurtwag aan die gang en hou die gemeenskap deur middel van WhatsApp-boodskappe op hoogte van wat in hulle omgewing aangaan. Op die manier kan mense ook vreemde persone, voertuie ens. rapporteer en sodoende almal bewus maak van moontlike gevare."

Indien enigiemand meer wil weet oor buurtwagte skakel gerus die sektorbevelvoerder van die betrokke gebied: