DE RUST NUUS - De Rustica Olive Estate buite De Rust het weereens stof in die oë van ander gevestigde produsente van olyfolie geskop met die ver-owering van drie goue en twee silwermedaljes.
De Rustica se olyfolie was 3 van 36 wat goue medaljes verower het. Dié olyfolies van die 2016 oesjaar is verlede Donderdag tydens die SA Olive gala-dinee as die beste in Suid-Afrika vereer.
Die premium produkte het goue medaljes in drie kategorieë – Delikaat (6), Medium (20) en Intens (10) – verower. De Rustica se olyfolies het 'n goue medalje in elke kate-gorie gewen. Vanjaar se kompetisie was die elfde een en het 'n rekord van 110 inskrywings gelok.
Die De Rustica Estate Delicate EVOO (Extra Virgin Olive Oil) het goud in die Delikaat-kategorie gewen. In die medium-kategorie het die De Rustica Estate Medium EVOO vir goud gesorg en hulle De Rustica Estate Intense EVOO het met die die landgoed se derde goue medalje gespog. De Rustica was een van slegs vyf produsente wat elk met drie goue medaljes kon spog.
Die landgoed se De Rustica Estate Reserve en De Rustica Mountain Reserve is elk met 'n silwermedalje beloon.
'n Span professionele proeërs onder leiding van Dr Antonio G Lauro van Italië, het die medalje-aanspraakmakers omsigtig individueel geëvalueer in terme van kwaliteit, kompleksiteit en balans van aroma en smaak tydens 'n vierdag se blinde proe.
Rob Still, wat De Rustica begin het, het in reaksie gesê die reeks goue medaljes wat De Rustica as 'n jong landgoed die afgelope vier jaar ingeryg het is 'n bewys dat die mikroklimaat van De Rustica se boorde uiters geskik is vir die lewering van olyfolie van uitstaande gehalte. Hy sê ook dat De Rustica tans besig is met 'n program om die wetenskap en fyn kuns van olyfolie te verbeter en dat hy uitsien na selfs beter produkte.
'Ons bring jou die nuutst Klein Karoo nuus'
