OUDTSHOORN NUUS - Uitvoerende burgemeester, Colan Sylvester, het hom, die raad en die munisipaliteit daartoe verbind om beter dienslewering aan die dorp se gemeenskap te lewer.
Tydens Vrydagaand, 17 Maart, se eerste Oudtshoorn-burgemeestersbal het Sylvester gesê: "Oudtshoorn is bekend daarvoor om geskiedenis te maak. Dit gaan weer gebeur, maar die keer vir die beter."
Die glansfunksie is ook bygewoon deur Bongkikosi Madikizela (minister van menslike nedersetting en waarnemende leier van die DA in die Wes-Kaap), parlementslede, burgemeesters en raadslede van omliggende dorpe.
Sylvester het aan die gaste gesê alle inwoners van Oudtshoorn is vir hom ewe belangrik ten opsigte van munisipale dienslewering. "Ons wil 'n beter diens aan die gemeenskap lewer. Dit sluit in mense op straat, die skep van geleenthede vir gestremdes, ons jeug en jong vroue."
Hy het die doel van die burgemeestersbal beskryf as 'n geleentheid om fondse te in vir die dorp se nie-regeringsorganisasies in areas waar werk gedoen word om kinders, gestremdes, slagoffers van geweld en die jeug te help.
Sylvester het die kwessie van behuising herhaaldelik beklemtoon en dit as 'n prioriteit beskryf in dienslewering.
"In Oudtshoorn staar ons baie gekompliseerde uitdagings in die gesig. Ek wil u verseker dat ons daartoe verbind is om hierdie uitdagings te oorkom. Die pad sal nie maklik wees nie, maar ons sal hard werk, hand-aan-hand en sy-aan-sy met al ons vennote, om ons visie vir 2020 moontlik te maak.
"Ons gaan geleenthede en meer werk skep, die munisipaliteit meer verantwoordbaar maak, korrupsie uitroei en veiliger omstandighede vir ons gemeenskappe skep."
Madikizela het as gasspreker die munisipaliteit bedank en vereer vir wat hulle doen vir die gemeenskap. Hy het oop kaarte gespeel en die ekonomie in Suid-Afrika as "nie goed nie" beskryf. "Hierdie (die swak ekonomie) is een van ons uitdagings. Daarom maak ons staat op die privaat sektor om 'n bydrae te lewer tot beter regering."
"Ons as regering vat verewig om dinge gedoen te kry. Soms raak sakelui gefrustreerd en daarom het ons u nodig om ons by te staan. Ons het u nou meer nodig as ooit."
Die minister het skokkende syfers voorgehou, waar hy gesê het dit is kommerwekkend dat 69% van die regering se begroting net vir drie doelwitte aangewend word. Dit is die afbetaal van skuld, die betaling van toelaes en die beta-ling van salarisse.
"Dit is kommerwekkend, want ons word met net 31% van die begroting gelaat om die res van die regering se take te verrig. Ons is in 'n situasie waar die populasie vinniger groei as die ekonomie. As jy jouself in daardie situasie bevind, is jy in die moeilikheid. Ons het beleggers nou meer nodig as ooit."
In sy afsluitingsrede het Madikizela gesê: "Ons het 'n verantwoordelikheid teenoor die wat vir ons gestem het. Ons moet aan hulle bewys dat dit wat ons doen, doen ons waarvoor ons ver-kies is. Ons moet 'n verskil in mense se lewens maak."
Tydens Oudtshoorn se eerste burgemeestersbal is voor, van links Melvin Naik (George-burgemeester) Bonginkosi Madikizela (Wes-Kaapse minister van menslike nedersettings), Colan Sylvester (Oudtshoorn-burgemeester), Eleonor Bouw-Spies (Knysna-burgemeester) en Maruis Koen (Saldanha-burgemeester). Agter: Erik Marais: LPP, Noluthando Mwati (Oudtshoorn-onderburgemeester) Jaco Londt (LP), mev. Naik (gade van George-burgemeester), Amy Sylvester (gade van Oudtshoorn-burgemeester) en Rowan Spies (Eden-raadslid).
Burgemeester sê dankie
"Die aand was 'n wonderlike sukses en ek is dankbaar vir al die borge en gaste wat die aand vir ons moontlik gemaak het," het burgemeester Colan Sylvester gesê.
Die eerste burgemeester maskerbal het sowat R77 000 ingesamel.
Sylvester bedank al die borge wat daartoe bygedra het dat die aand se verrigtinge, vanaf die maskers, ete, musiekgroep, dekor en fotograaf betaal is sonder dat Oudtshoorn-munisipaliteit 'n hand in sy eie sak hoef te
steek.
Die maskerbal was op Vrydagaand, 17 Maart, en die doel van hierdie aand was om fondse in te samel vir ons mishandelde vroue en weeskinders.
Die volgende besighede het elk groot bedrae geskenk vir hierdie spesifieke doel.
Martin & EA (Zebra)
Pennypinchers
Civil Corp
Asla
Toploos
Klein Karoo International
Aifa
Cango Wildlife Ranch, Kango-grotte, Wilgewandel, Calitzdorp Spa en Aifa het die gaste verras met wonderlike pryse wat gewen was deur die loop van die aand. Oudtshoorn Courant, Die Hoorn, Die Herrie, SFM en EDENfm het addisionele gratis uitgawes en publikasies geborg gedurende die bekendmaking van die maskerbal.
Die musiekgroep, Funky Afro, het hulle goed van hulle taak gekwyt. Die fantastiese dekor is voorsien en gedoen deur mev. Mars en Maria Arries.
Marilize Oosthuysen het die smullekker kos voorberei.
Die fotograaf Awie Hendricks, het die gemaskerde gaste afgeneem.
Die gasspreker, minister Bonginkosi Madikizela, het tydens sy toespraak gesê dat dit sy hart goed doen om te sien dat een van Oudtshoorn-munisipaliteit se doelwitte 'n beter lewe vir mishandelde vroue en kinders is. 'n Memorandum van verstandhouding is ook op Vrydagoggend deur die burgemeester en minister Albert Fritz onderteken.
Hierdie twee geleenthede wat dieselfde doelwitte nastreef, het die pad oopgemaak vir die department van sosiale ontwikkeling en die munisipaliteit om saam te werk om hierdie doelwitte te verwesenlik.
ARTIKEL & FOTO'S: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
