NASIONALE NUUS - Sukkel jy na ‘n traumatiese ervaring? Voel jy skuldig, bang, verward, oorweldig, woedend? Ervaar jy terugflitse, herhalende nagmerries, verandering van eetlus?
Trauma word verduidelik deur Karin du Plessis, projekbestuurder en waarnemende direkteur van Families SA (Famsa) Knysna en Plettenbergbaai.
Trauma verwys na die blootstelling aan ‘n werklike of bedreigde dood, ernstige besering of seksuele teistering.
Die getraumatiseerde persoon
‘n Voorval is traumaties as gevolg van ‘n gebeurtenis buite jou beheer. Mense verskil, daarom ondervind elke persoon trauma op ‘n verskillende manier. Sommige mense wil graag oor die voorval praat, terwyl ander verkies om nie daaroor te praat nie. Niemand moet gedwing word om oor die voorval te praat nie.
Die emosies wat jy ondervind is normale reaksies as gevolg van ‘n abnormale gebeurtenis. Die emosies wat mag voorkom is skok, ontkenning (“ek wil dit nie glo nie”), woede, frustrasie, skuldgevoelens, afgesonderdheid, hartseer, hulpeloosheid en depressie.
Post-traumatiese stresreaksie na die voorval
Hierdie reaksies word deur die meeste mense ervaar. Dit sal met tyd verminder en verdwyn. Sou dit voortduur, moet professionele hulp aangevra word. Sommige mense ervaar sommige of geen van hierdie emosies nie. Dit is ook normaal.
Sommige stresreaksies
• Moegheid
• Nagmerries
• Gemoedsveranderinge
• Konsentrasie probleme
• Terugflitse na die voorval
• Te veel slaap
• Spierspanning
• Sosiale afsondering
• Geheueverlies
Hanteringstrategieë
• Vra vir hulp, ryk uit na ander.
• Huil as jy wil.
• As jy wil, praat oor die voorval met iemand wat wil luister.
• Humor – onthou, lag is die beste medisyne.
• Doen oefeninge, bv gaan stap of draf.
• Bid of mediteer.
• Rus, luister na musiek en eet ‘n gebalanseerde diet.
• Probeer so ver moontlik om weer by jou ou roetine in te skakel.
• Kry individuele berading.
* Meer inligting: Famsa Knysna 044-382-5129, Plettenbergbaai 044-533-0515
'Ons bring jou die nuutste Tuinroete, Klein Karoo, Hessequa nuus'
