Vriende se finale eerbetoon aan Liza

OUDTSHOORN NUUS - Die meer as 100 mense by La Dolce Vita raak stil as die bekende akteur Eric Nobbs, die mikrofoon vat met die woorde "Hierdie is vir Liza" en Boerneef se gedig voorlees:

"Die berggans het 'n veer laat val
van die hoogste krans by Woe-perdal
my hart staan tuit al meer en meer
ek stuur vir jou die berggansveer
mits dese wil ek vir jou sê

hoe diep my liefde vir jou lê"

Agter hom op die klein verhogie vanwaar hy die aand se vasvra ter herinnering van sy lewensmaat, Liza Gelderblom, gelei het, staan Christoff Bezuidenhout en luister en daarna sê hy net een woord "Liza".

Dit was Dinsdagaand en La Dolce Vita was stampvol met 13 spanne wat vir die Liza-tribute Pub Quiz ingeskryf het, sowel as 'n hele aantal besoekers wat net hulle laaste eer kom betoon het. Liza (35) is verlede Maandag na 'n koma van ongeveer twee weke in George oorlede. Sy het elke tweede week gesorg vir die vrae wat spanne tydens die gewilde Pub Quiz laat kopkrap het en Dinsdagaand is die moeilikste vrae wat tydens die vorige bykans 50 vasvrae gebruik is, weer gevra.

Tussen die vrae deur was daar geleentheid vir vriende om iets oor Liza te sê en dit was weereens duidelik dat die kaalvoetkind van Van Wyksdorp met haar ewige glimlag 'n reuse-indruk op almal gemaak het.

Wilhelm Vincent het die besoekers genooi om Al lê die berge nog so blou saam met hom te sing en Francois Brill het op sy beurt voorgevat met Lisa se klavier.

(Dit is eers wanneer 'n mens sien hoe elke persoon op sy eie manier die verlies van iemand verwoord en met ander deel dat jy besef watter invloed een persoon op 'n ander kan hê en op hoeveel vlakke mense se lewens deur net 'n glimlag of 'n sagte woord geraak kan word.)