OUDTSHOORN NUUS - Die vonnisoplegging van die voormalige hoofbestuurder van Kango Wyne op Oudtshoorn, Johan Brits, is voorverlede Vrydag op Oudtshoorn in die streekhof vir voorvonnisbetoë tot volgende jaar uitgestel na die aanhoor van 'n maatskaplike werker, 'n beampte van korrektiewe dienste asook 'n deskundige in die wynbedryf, dr David Mullins.
In die maatskaplike en korrektiewe verslae word aanbeveel dat Brits ingevolge Art 276 (1) (I) tronkstraf opgelê word.
Nortje het in sy uitspraak vroeër, gesê dat die staat bo redelike twyfel Brits se skuld bewys het. Volgens hom het al die getuies met uitsondering van die van Johannes Pieterse, Brits se tuinier, goeie getuienis gelewer.
Volgens Nortje het Jannie van Staden van die departement landbou ook baie goed getuig, "Daar was nie onwaarskynlikhede in sy getuienis nie en dit is gestaaf deur dokumentêre bewysstukke," het die landdros gesê.
"Die verdediging het gewag gemaak van die feit dat die maatskappy of direksie van Kango Wyne vervolg moes word en dat die regte party nie voor die hof is nie. Daar was egter geen getuienis teen die twee nie en dat die direksie nie 'n aandeel gehad het in die verspreiding en bemarking van 'Ale' sonder die regte etikette."
Volgens die landdros is hy van oordeel dat die regte party voor die hof is en dat hy 'n wanvoorstelling gemaak het deur 'Ale' te vervaardig en dit as wyn bemark het.
'Die hof is tevrede dat die staat wel bo redelike twyfel bewys het dat die beskuldigde 'n wanvoorstelling gemaak het en 'Ale', vermeng met wyn, na die mark is.
Die hof het ook bevind dat Jannie van Staden wat tenke verseël het regmatig opgetree het en die verbreking van seëls, in opdrag van Brits, onregmatig en opsetlik was.
Brits is onskuldig bevind op twee aanklagte van intimidasie en een van oortreding van 'n drankwet wat vroeër herroep is.
Vonnisoplegging is vir voorvonnisverslae van die departemente maatskaplike en korrektiewe dienste tot 23 Oktober uitgestel.
Adv. Louis van Niekerk van die kantoor van die direkteur van vervolging (Wes-Kaap) is die aanklaer. Adv. Marthinus Barnard verskyn namens Brits.
Klik hier vir vorige artikels:
- Voormalige bestuurder skuldig aan bedrog
- Opvolg: Ontslag geweier in Brits-bedrogsaak
- Hof wil Brits nie verskoon vir 'bier'-mengsel
- Uitspraak in Brits-saak dalk September
- Brits-hofsaak uitgestel tot 2014
'Ons bring jou die nuutste Oudtshoorn, Klein-Karoo nuus'
