OUDTSHOORN NUUS - Daar blyk groot verwarring te wees ten opsigte van die wettigheid van ‘n optog wat môre plaasvind onder die vaandel van KKBBCCI (Klein Karoo Black Business Chamber of Commerce and Industries).
Volgens ‘n kennisgewing wat verlede week deur Jacobus Martins op ‘n briefhoof van KKBBCCI uitgestuur is, vind die optog plaas om die swart gemeenskap te bemagtig en om standpunt in te neem teen wit oorheersing van die besigheidsektor.
Die optog is vir 11:00 vanaf die sirkel by Penny Pinchers beplan.
Intussen het die voorsitter van KKBBCCI, Freddie Schroeder, gister ‘n dringende brief onder dieselfde briefhoof uitgestuur waarin dit gestel word dat KKBBCCI hulle heeltemal van die optog distansieer. Volgens sy skrywe word die optog sonder ‘n mandaat van die bestuur gereel en sal daar teen lede van KKBBCCI opgetree word sou hulle die optog ondersteun.
Die Oudtshoorn Courant het telefonies met beide gesels en elkeen het beweer dat die ander nie namens KKBBCCI optree nie.
Volgens Martins is Schroeder nie die voorsitter nie en volgens Schroeder reël Martins die optog met sy eie persoonlike agenda.
'Ons bring jou die nuutste Oudtshoorn, Klein Karoo nuus'
