OUDSTHOORN NUUS - 'n Ernstige sekerheidsbreuk by die Bridgton-sportterrein waar die NRVP die parlement na die mense bring, het Dinsdag tot verskeie rooi gesigte gelei.
Dit nadat 'n ongenooide man van Thembalethu, George, daarin geslaag het om die hoë sekerheidsgebied waar ministers en ander senior parlementêre personeel byeen was, binne te gaan en vrylik rond te beweeg.
Die voorval het vrae laat ontstaan oor die doeltreffendheid van sekuriteit in die BBP-area, veral in die lig daarvan dat die adjunkpresident, Cyril Ramaphosa, die verrigtinge Vrydag gaan bywoon.
Die man wat verantwoordelik was vir die geskarrel en vrae rondom veiligheid van belangrike persone is Zisile Moyi, ook bekend as Chayi, die ondervoorsitter van Cope in die Suid-Kaap. Hy het Dinsdag die BBP-veiligheidsterrein binnegegaan met 'n BBP-identifikasiekaart wat aan Isaya Stimela, 'n lid van die George-burgemeesterskomitee uitgereik is.
Die BBP-kaart vertoon Stimela, wat glad nie soos Moyi lyk nie, se foto en naam.
Die George Herald, susterskoerant van die Oudtshoorn Courant, is meegedeel dat mense wat aansoek gedoen het om BBP-akkreditasie aan streng sekerheidsmaatreëls moes voldoen. Lede van die polisie is ook by alle ingange ontplooi om te verseker dat gaste geldige akkreditasie het.
Dit blyk dat Moyi die tema van die NRVP, 'Bring die parlement na die mense', letterlik opgeneem het en homself genooi het om met ministers skouers te skuur. Hy is in die tent waar slegs BBP-besoekers toegelaat is aangekeer waar hy vrylik tussen ministers en ander senior ampsdraers rondbeweeg en geëet het.
Volgens 'n bron, wat ook in die tent was, het 'n polisielid Moyi, gekleë in 'n swart hemp en broek, opgemerk en gesien dat die BBP-kaart iemand anders se foto vertoon. Moyi is onder polisiebegeleiding uitgeneem. Daar word beweer dat hy Maandag ook die verrigtinge bygewoon het.
Dit is onbekend hoe Moyi die identifikasiekaart van Stimela bekom het aangesien Stimela met ander verpligtinge in Uniondale besig was. Hy is egter onmiddellik na Oudts-hoorn ontbied waar die omvang en erns van die sekerheidsbreuk aan hom verduidelik is. Beide mans is deeglik ondervra waarna hulle met ernstige waarskuwings laat gaan is. Die polisie het ook met ander raadslede en amptenare van George gepraat om meer oor Moyi uit te vind. Stimela het die voorval bevestig en gesê: "Dit was net 'n misverstand."
By navraag aan die polisie het kol. Tembinkosi Kinana die George Herald na die parlementêre woordvoerder, Luzuko Jacobs, verwys. Jacobs het gesê hulle is tevrede met die verduideliking wat Moyi en Stimela oor die BBP-kaart gegee het.
"There was quick action from the police. The men were let go on a warning after their interviews. Adequate and appropriate protocol is followed by all attendees and we have a security plan in place that runs with the parliamentary event currently underway," het hy gesê.
Die George Herald het Moyi vir kommentaar probeer kontak, maar hy het nie sy selfoon geantwoord nie.
Tydens 'n besoek van die Oudtshoorn Courant Woensdag en gister was veiligheidsmaatreëls baie streng en in teenstelling met Maandag en Dinsdag het polisielede elke besoeker se identifikasiekaart nagegaan om te verseker dat die foto en die persoon ooreenstem. Die adjunkpresident, Cyril Ramaphosa, spreek van-oggend die men-se toe.
Isaya Stimela, komiteelid van George se burgemeesters-komitee.
Klik hier onder vir vorige nuusflitse:
- Veiligheidsbreuk laat vrae oor sekuritiet
- Ekonomiese groei en onderwys lok gehore
- Cyril Ramaphosa môre in Oudtshoorn
- Nasionale Raad gesels oor onderwys
- Opvolg: Nasionale Raad vergader
- Nasionale Raad vergader in Oudtshoorn
Zisile Moyi
ARTIKEL: LIZETTE DA SILVA, GEORGE HERALD JOERNALIS.
'Ons bring jou die nuutste Oudtshoorn, Klein-Karoo nuus'
