OUDTSHOORN NUUS - Die onsekerheid oor wie die gewese burgemeester van Oudtshoorn, Gordon April, se hofonkostes verder gaan dek is Woensdag uiteindelik in die Oudtshoorn-streekhof opgeklaar.
Die hofsaak van April en 'n amptenaar Raymond Wagenaar kom al sedert 2011 aan toe klagtes van diefstal, regsverydeling en intimidasie teen die twee gelê is nadat daar na bewering sand en klip met munisipale vervoer na April se huis vervoer is.
Die munisipaliteit het April en Wagenaar se regskostes tot met die begin van die verhoor vroeër vanjaar betaal, maar nadat die DA meer as 'n maand gelede die raad oorgeneem het, het die nuwe burgemeester rdh Wessie van der Westhuizen voet by stuk gehou dat geen verdere regskostes gedra sal word nie.
Volgens hom het hy eers Woensdagoggend uitgevind dat Human in die hof getuig het dat die regskostes wel verder betaal sal word.
Verryne het 'n brief wat om 10:51 Woensdagoggend aan Francois Human, Ben Botes en Phumzo Tofile, bestuurder van kontrakte en regsdienste by die munisipaliteit gestuur is voorgelees.
Volgens hom kom die brief van Omega Bezuidenhout, 'n munisipale amptenaar, waarin sy sê dat die munisipaliteit wel die regskostes gaan dra.
Van der Westhuizen het gesê hy het 'n ondersoek wat op 11 September sal begin, gelas oor die brief en bygevoeg dat hy kort voor sy afspraak by die hof opdrag gegee het dat die brief gestop moet word.
Volgens hom het die munisipaliteit reeds ongeveer R1 miljoen aan die sogenaamde sand-en-klip-saak se hofonkostes spandeer. in Reaksie hierop het Verryne opgemerk: " 'n Miljoenrand vir drie duisendrand se sand en klip?"
Landdros Mark van Wyngaardt het aan April en Wagenaar geleentheid gegee om aan Van der Westhuizen vrae te rig en beide van hulle was dit eens dat die burgemeester leuens vertel en dat hy aan hulle gesê het die munisipaliteit sal die onkostes dek. Beide het egter daarna aangedui dat hulle voortaan hulle eie regsverteenwoordigers sal gebruik.
Van Wyngaardt het die saak tot 8 September uitgestel sodat hulle regsverteenwoordiging kan kry en daar op verhoordatums besluit kan word.
Die aanvanklike saak wat teen April en Wagenaar aanghangig gemaak is, is deur die hof uitgegooi, maar is weer hervat nadat Afriforum toegetree het en by die DOV daarop aangedring het dat die saak weer op die rol geplaas moet word.
Klik hier vir vorige artikels:
ARTIKEL: HANNES VISSER, OUDTSHOORN COURANT - REDAKTEUR
'Ons bring jou die nuutste Oudtshoorn, Klein-Karoo nuus'
