OUDTSHOORN NUUS - Voortdurende optredes deur die polisie dwelmverkeer tussen provinsies hok te slaan het weer vrugte afgewerp met die arrestasie van twee verdagtes wat in besit was van dwelms ter waarde van R750 000.
Volgens kaptein Malcolm Pojie, Suid-Kaapse polisiewoordvoerder het polisielede Dinsdagoggend om 04:45 as deel van roetine ondersoeke 'n passasiersbus in Beaufort-Wes voorgekeer.
'n Sportsak met 15 pakkies tik van ongeveer 1,5 kg en vyf sakke met 5 000 Mandrax-tablette is in die bus se bagasieruim ontdek. Die waarde van die dwelms word op R750 000 geskat.
Twee verdagtes, 'n 36-jarige Nigeriër en sy metgesel, 'n 17-jarige Suid-Afrikaanse vrou is op die toneel gearresteer en het Woensdag in die hof op Beaufort-Wes verskyn.
Volgens Pojie stuur hierdie arrestasies 'n duidelike boodskap aan voornemende dwelmhandelaars om nie dwelms na die Wes-Kaap te smokkel nie.
Die waarnemende provinsiale kommissaris van polisie, genl.maj. Thembisile Patekile, het die betrokke lede geloof vir hulle optrede en toewyding.
Klik hier vir verwante artikels
- 2 vas vir R750 000 se dwelms
- R85 000 se kokaïen in koffie gevind
- Jongmense sê nee vir dwelms en drank
'Ons bring jou die nuutste Oudtshoorn, Klein-Karoo nuus
