BEAUFORT-WES NUUS – Sylvester, die rondloperleeu van die Karoo Nasionale Park buite Beaufort-Wes, gaan van kant gemaak word.
Dit volg nadat die leeu gister weer uit die park uitgebreek het.
“Ons sal ongelukkig die leeu van kant moet maak,” het Fayroush Ludick, woordvoerder van SANParke vanmiddag gesê.
“Hy het gister nog beeste gevang en ons weet nie hoe hy gaan reageer as hy ‘n mens teekom nie. Ons het ’n verantwoordelikheid teenoor die gemeenskap om hulle te beskerm voordat ’n mens se lewe op die spel is.”
Die jong leeumannetjie het verlede jaar opslae gemaak toe hy uit die park ontsnap het deur onderdeur ’n geëlektriseerde heining te kruip – presies wat hy dié keer ook gedoen het.
Dit het veldwagters en spoorsnyers en lugondersteuning meer as 20 dae gekos om hom weer veilig in die park te kry. Hy was maande lank in ’n boma voordat hy weer in die park vrygelaat is. Daar is gehoop dat hy met nog ’n jong leeu-mannetjie en -wyfie ’n nuwe trop sal vorm.
Die nuwe mannetjie is egter dood en Sylvester het 'n ruk lank saam met die nuwe wyfie geloop.
Volgens Ludick het parkpersoneel gisteroggend die sein van sy satelliet-opsporingskraag buite die parkgrense opgetel. “Veldwagters en spoorsnyers is dadelik na die park se noordwestelike heining waarvandaan die sein gekom het.”
Tussen agt en tien personeellede het Sylvester te voet agterna gesit, maar teen gisteraand het hulle hom nog nie ingehaal nie. Hulle het teruggekeer park toe vir die nag.
Sylvester is vanoggend sowat 20 km noordwes van die park opgetel.
“’n Helikopter is nou op soek na hom. As hulle hom kry sal hy verdoof word en teruggebring word park toe, waar die nodige stappe geneem sal word.”
Klik hier vir verwante artikels:
- Sylvester die leeu weer tuis
- Opvolg: Karoo-leeu terug na 3 weke
- Escaped lion finally caught
- Hulp uit alle oorde om leeu te vang
- Opvolg: Leeu te slim vir spoorsnyers
- Opvolg: Leeu glo in Noord-Kaap
- Helikopter ingespan vir leeu-soektog
- Leeu speel wegkruipertjie
- Opvolg: Spore gevind na leeu ontsnap
- Lion breaks out of Karoo National Park
