BEAUFORT-WES NUUS - Die toekoms van die leeu wat tussen 5 en 29 Junie die hele land op hol gehad het nadat hy uit die Karoo Nasionale Park ontsnap het, is nog nie heeltemal seker nie.
“Hy gaan definitief nie van kant gemaak word nie,” sê Reynold Thakhuli, woordvoerder vir SANParke.
Die leeu, wat glo deur boere Sylvester gedoop is, is Maandagmiddag omstreeks vyfuur sowat 20 km van die park af opgespoor.
‘n Veearts van SANParke het die drie jaar oue leeumannetjie vanuit ‘n SANParke-helikoper met ‘n pyl verdoof voordat die leeumannetjie die laaste ent terug park toe in ‘n wildnet afgelê het.
Intussen word Sylvester in ‘n boma van sowat 2ha aangehou. Hy is van ‘n satelliet-nekband voorsien ingeval die wanderlust hom weer oorval.
“Sylvester gaan in die boma aangehou word totdat ons wetenskaplikes besluit wat die beste vir hom sal wees,” sê Reynold.
“Hy gaan nie noodwendig in die park waaruit hy padgegee het geplaas word nie. Ons neem aan hy is deur die ander leeumannetjies uitgedruk, wat ‘n natuurlike proses is.”
Twee ouer leeumannetjies is as jong leeus in 2010 na die Karoo Nasionale Park gebring vanaf die Addo Nasionale Park in die Oos-Kaap, waarheen hulle hervestig is uit die Kgalagadi Nasionale Park. Sylvester en sy boetie is in die Karoo Nasionale Park gebore, waar die boetie steeds vreedsaam vertoef terwyl Sylvester nuus gemaak het.
“Ons wetenskaplikes is besig te oorweeg wat met Sylvester moet gebeur, maar voordat hulle nie besluit met inagneming van al die feite nie, kan ons nie se nie,” sê Thakhuli.
“Die leeu het tydens sy omswerwinge van sowat 300 km die afgelope 24 dae aan ander omstandighede gewoond geraak, en indien hy teruggeplaas word in Karoo Nasionale Park kan hy dalk weer die bevlieging kry om te gaan rondloop as die ander leeumannetjies lelik met hom is.”
Intussen het Nico van der Walt, hoof van Karoo Nasionale Park, gesê die rondloper is in goeie kondisie, net ‘n bietjie voetseer.
Van der Walt en ‘n span van die park se veldwagters en spoorsnyers was die hele tyd op die leeu se spoor. Ander instansies het ook spoorsnyers, soekhonde en ‘n verskeidenheid vlieënde tuie tot SANParke se beskikking gestel.
Volgens Van der Walt was die reddingspoging dramaties, want die leeu het naby ‘n afgrond gelê toe hy verdoof is.
“Hy moes op ‘n wildnet gelaai word terwyl hy onder verdowing was en sowat 3 m van die afgrond af gelê het. Die helikopter se rotorlemme het feitlik aan die bergwand geraak.”
Die leeu, wat by Brandewynsgat in ‘n uitgespoelde rivierbedding deur ‘n stukkende draadmat gekruip het en die pad gevat het, het tydens sy tog van nagenoeg 300 km heen en terug ten minste twee dosyn skape en ‘n koedoe op ‘n reeks plase op sy roete gevang.
Sylvester het verlede week in die omgewing van Frazerburg in die Noord-Kaap vertoef voordat hy op sy eie begin terugloop het huis toe.
Hy is sowat 20 km van die park af in die Nuweveldberge wat bokant die park uittroon opgemerk en het die laaste ent huis toe per helikopter meegemaak.
“Die leeu het Vrydag op sy eie begin terugloop in die rigting van die park,” het Déan Gous, voorsitter van Agri Sentraal Karoo en ‘n ere-veldwagter, vroeër die week gesê.
Volgens Gous is die leeu op pad terug vanaf die Frazerburg-gebied op die plaas Wilgebosfontein en daarna op Koedoeskloof Wildplaas opgemerk. Maandagmiddag het hy teruggestap na Eltrus Mocke se plaas Palmietfontein waar hy tydens sy uittog ‘n klompie skape gevang het.
“Die leeu is op dié plaas opgemerk waar hy doodluiters in ‘n sonkolletjie gelê het,” vertel Gous.
Die verdoofde leeu word na 'n kamp in die Karoo Nasionale Park vervoer.
Moeggeloop. Huis toe gaan-tyd.
Hy meen ‘n leeu is maar deel van die katfamilie, “En ons weet mos: die kat kom weer.”
Henning Myburgh, bestuurder van Agri Noord-Kaap waar die leeu ‘n wyle vertoef het, het gesê die Noord-Kaapse boere is filosofies oor die leeu se teenwoordigheid en sy lus vir skaapvleis. “Die boere gee nie te veel om dat die leeu so skape vang nie – hulle is gewoond die jakkalse en rooikatte maak ook maar so,” is sy mening.
“Soos ‘n kat maar is, sal ’n leeu enige ding wat by hom verbyhardloop probeer vang,” is Gous se mening. “Dié een het duidelike ook die kuns aangeleer om deur drade te kruip terwyl hy so van plaas tot plaas gestap het.”
Gous meen die Karoo Nasionale Park van sowat 98 000 ha is groot genoeg vir vier leeumannetjies. “Die leeus was waarskynlik maar net naby Brandewynsgat toe die ander leeumannetjies hom geskraap het en hy onderdeur die draad ontsnap het.”
Leeus is in 2010 vir die eerste keer in 170 jaar in die gebied hervestig toe agt van hulle na die Karoo Nasionale Park gebring is. Die twee mannetjies, twee wyfies en vier welpies het intussen aangewas sodat daar nou – Sylvester en sy meer huisvaste boetie ingesluit - 12 leeus in die park is.
Die doel met die hervestiging van die leeus was en is steeds om uiteindelik al die wildspesies - en nie net vrylopende leeus nie - wat oorspronklik hier voorgekom het, in die gebied te hervestig, maar dit is ook ‘n toerismeaantreklikheid.
Die teenwoordigheid van ten minste een van die Groot Vyf het daarvoor gesorg dat die Karoo Nasionale Park nie net ‘n gerieflike oornagplek langs die N1 tussen die noordelike provinsies en die Wes-Kaap is nie, maar ook ‘n toerisme-bestemming in eie reg.
Vorige artikels:
- Opvolg: Karoo-leeu terug na 3 weke
- Escaped lion finally caught
- Hulp uit alle oorde om leeu te vang
- Opvolg: Leeu te slim vir spoorsnyers
- Opvolg: Leeu glo in Noord-Kaap
- Helikopter ingespan vir leeu-soektog
- Leeu speel wegkruipertjie
- Opvolg: Spore gevind na leeu ontsnap
- Lion breaks out of Karoo National Park
Verwante artikels:
- Lion Park death: Photo of moment tourist was attacked
- Tourist killed by lion was Game of Thrones video editor
- Fatal lion attack: Witness account
ARTIKEL: TISHA STEYN, OUDTSHOORN COURANT - KORRESPONDENT.
'Ons bring jou die nuutste Beaufort-Wes, Klein-Karoo nuus'
