OUDTSHOORN NUUS - Die Klein Karoo spog met ‘n splinternuwe trekpleister vir toeriste en nuuskierige inwoners wat nog nooit met ‘n mega-"foefie slide" teen ‘n berghang af geswiep het nie.
Cango Caves Estate is besig met die finale afronding aan ‘n unieke dubbele zipline oor twee lengtes van onderskeidelik 180m en 500m.
“Ons is altyd op soek na nuwe maniere om toeriste te lok, nie net vir ons eie gewin nie, maar ook tot voordeel van toerisme in Oudtshoorn en die Klein Karoo,” sê Jean Botha, mede-eienaar van Cango Caves Estate.
Die zipline se boonste vertrekpunt is langs die Kango Grotte se parkeerterrein geleë. Van hier af swiep die dubbele staalkabels 180 m ver oor ‘n vallei met tipiese Karooveld. Van die landingsplek af stap ‘n mens sowat dertig meter om die koppie tot by die volgende punt vanwaar nog twee kabels jou 500 m teen die helling af swiep tot by Cango Caves Estate se restaurant.
Volgens Botha is die zipline met die tegniese kundigheid van Canopy Tours wat altesaam agt ziplines in die land bedryf, waarvan die Cango Caves Zipline die nuutste is. Dit is ook die enigste een wat die geleentheid bied vir twee persone om saam-saam die ervaring te geniet.
Die deelnemer word voorsien van ‘n veiligheidsharnas wat om die lyf en bene vasgemaak word sodat jy nie kan uitval nie.
“Dit is ook nie eens nodig om aan die stang van die katrol vas te hou nie want die aksie is stabiel en ‘n mens kan nie buite beheer rondswaai nie.”
Met die installering van die zipline word ook ‘n klomp nuwe werkgeleenthede geskep. Vir bouwerk aan die ankerplekke van die staalkonstruksie en die span van die kabel is sowat twintig mense in diens geneem.
“Wanneer die zipline in gebruik geneem word, sal daar ook werkgeleenthede vir operateurs by die vertrek- en landingsplekke wees. Canopy Tours sal hulle oplei om aan internasionale veiligheidstandaarde te voldoen.”
Jean Botha wys hoe die harnas vasgemaak word sodat selfs kinders en gestremdes veilig met die 'zipline' na benede kan swiep.
ARTIKEL EN FOTO'S: TISHA STEYN
'Ons bring jou die nuutste Oudtshoorn, Klein Karoo nuus'
