OUDTSHOORN NUUS - Die polisieopleidingsakademie op Oudtshoorn het Woensdagoggend, as deel van die kollege se sosiale aanspreeklikheid, sanitêre doekies en klerasie aan die Oudtshoorn Vaardigheidskool en Huis Triomf oorhandig.
Die waarnemende bevelvoerder van die kollege, kol. Ratsela Tala en sy bestuur het altesaam 187 sanitêre doekies aan Gavin Block, hoof van die Vaardigheidskool, en klerasie soos skoene en truie, asook 'n aantal komberse aan die hoof van Huis Triomf, Irma Olivier, oorhandig.
"Ons is daarvan bewus dat baie meisies maandeliks vir 'n paar dae nie skool bywoon nie omdat hulle nie sanitêre doekies kan bekostig nie," het Tala gesê.
Volgens Tala is alles moontlik gemaak danksy skenkings van die kollege se personeel en studente.
"Ons probeer om op die eenvoudige manier 'n verskil te maak in ander se lewens."
Die kollege het volgens Tala einde verlede jaar ook sowat 180 blikkies kos aan vier inrigtings op Oudtshoorn oorhandig en is volgens Tala tans besig met 'n skoenprojek wat daarop gemik is om skoene in te samel vir leerlinge wie se ouers dit nie kan bekostig nie.
Tala het ook spesiale sertifikate aan die hoofde van die twee inrigtings oorhandig "om dankie te sê vir hul lojale ondersteuning vir die gemeenskap".
Mense wat die kollege se skoenprojek wil ondersteun kan ao Mostert by 044 203 2200 skakel.
Personeellede van Huis Triomf en die polisiekollege.
Gavin Block (links), hoof van die Klein-Karoo Vaardigheidskool en kol. Ratsela Tala (regs) saam met betuurslede van die polisiekollege en leerders van die skool.
ARTIKEL & FOTO'S: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
