UNIONDALE NUUS - Danksy 'n internasionale hulpfonds het vroue in die landelike gebied van Kammanassie sowat 20 km vanaf Uniondale kos om te eet, hulle kan ‘n inkomste verdien en die kinders kan skool toe gaan.
Dit is te danke aan Ricardo Classen van Uniondale, wat met die hulp van die Global Fund sedert 2010 die lewens van volwassenes en kinders wat geraak word deur MIV/Vigs, tuberkulose en seksueel oordraagbare siektes, in die afgeleë landelike gebied ingrypend verander het.
Classen bestuur drie projekte vir die Global Fund, ‘n internasionale hulpfonds wat poog om die epidemiese voorkoms van hierdie siektes wêreldwyd te stuit.
Dit word gedoen deur tasbare ondersteuning aan individue en gesinne deur voedselsekerheid, inkomsteskepping en versorging van kinders wat wees gelaat of kwesbaar is.
Die Global Fund verskaf R60 000 per projek per jaar. Die geld word in Suid-Afrika deur die departement van gesondheid aan nie-regeringsorganisasies soos BUIG (Bidgroep van Uniondale Interkerklike Gemeenskap), wat deur die geestelike leiers van Uniondale in die lewe geroep is, beskikbaar gestel, en die projekte word bestuur uit Classen se Little Theatre Cafe in die dorp.
Altesaam 40 huishoudings met MIV/Vigs of TB-pasiënte wat deur die personeel van die departement se mobiele klinieke en hulpwerkers geïdentifiseer is, ontvang maandeliks kospakkies ter waarde van tussen R200 en R300.
“Nie-amptelik bereik die kospakkies tussen 70 en 80 mense. Klere en vars groente en vrugte wat anoniem deur boere geskenk word, vul die kospakkies aan.
“Ons is nie ‘n sopkombuis nie,” beklemtoon Classen. “Die kospakkies word net verskaf indien die pasiënte hul medikasie gebruik. As die klinieksuster vind hulle bloedtelling is af, weet sy ‘n pasiënt gebruik nie die medikasie nie, en dan word die pasiënt na berading van die stelsel verwyder indien sy nog steeds versuim om die medikasie te gebruik.”
Die kospakkies bevat voedsame kos soos onder meer vis, bone, grondboonbotter, kitsnoedels, kitsmieliepap, kitssop, rooibostee en suiker. “In sommige gevalle is die pasiënt te siek om kos te maak, en dan moet die kinders vir hulself kos maak, en daarom sluit die kitsprodukte in, wat ook min energie gebruik om gaar te maak.”
‘n Groep van sowat 14 vroue uit die Kammanassie verdien ‘n inkomste uit naaldwerk.
Die projek is ‘n paar jaar gelede op eie inisiatief deur Irene Woudberg van ‘n plaas in die Kammanassie begin. Toe Global Fund geld begin beskikbaar stel is Woudberg gevra om in te skakel by BUIG.
Met die hulp van die Global Fund is drie Brother-naaimasjiene aangekoop en Woudberg het die vroue geleer naaldwerk doen. Hulle maak kussings, voorskote, sakke en komberse van laslappies wat Woudberg by geskenkwinkels in Uniondale, George en Oudtshoorn bemark.
Met die hulp van die Global Fund word sowat 20 kinders uit die Kammanassiegebied onderhou - en veral op skool gehou. “Die hoofdoel is om die kinders te help om ten minste matriek te maak of selfs verder te gaan studeer,” vertel Classen.
Een so ‘n weeskind is Jonathan Vaaltyn (18). Jonathan se ma, wat by die laslappieprojek betrokke was, se ma is dood en sy pa dien gevangenisstraf uit. “Dit het Jonathan op 16 vir alle doeleindes wees gelaat.”
Met die toestemming van die departement van gesondheid het Classen vir Jonathan onder sy vlerk geneem om toe te sien dat hy matriek aan die Hoërskool Uniondale slaag. Daarna staan sy kop polisie of weermag toe.
“Ek wil graag vir elke kind die ondersteuning gee sodat hy of sy in ‘n volwaardige landsburger kan ontwikkel.”
Vir meer inligting oor die projekte, kontak Ricardo Classen by littletheatrecafe@gmail.com of 044 752 1076 of 074 934 5412.
Irene Woudberg, heel links en Rico Classen, middel, saam met van die vroue wat laslappiewerk doen. Foto: Verskaf
Ricardo (Rico) Classen in die Little Theatre Cafe op Uniondale. Foto: Tisha Steyn
ARTIKEL: TISHA STEYN, OUDTSHOORN COURANT KORRESPONDENT.
'Ons bring jou die nuutste Oudtshoorn, Klein-Karoo nuus'
