OUDTSHOORN NUUS - "Dit was 'n nagmerrie, nooddienste kon nie by ons uitkom nie", so het een van die passasiers op die Greyhound-bus vertel wat Maandag in Meirings-poort buite Oudtshoorn vir meer as vyf uur vasgekeer was.
Garreth Scheepers (40) van Pacaltsdorp was een van die 18 passasiers op die dubbeldekkerbus wat op pad Johannesburg toe was.
"Die busbestuurder het by die laaste drif, voor jy by Meirings-poort uitgaan, besef ons gaan dit nie maak nie en het gestop omdat die water te kwaai afgekom het," het Garreth gesê. "Dit was nie lank nie toe is die bus vol water."
Volgens Garreth het hy die mense gekry om tot op die boonste vlak te beweeg.
"Ek het die nooduitgang oopgeslaan sodat die mense op die dak kan gaan sit," het Garreth gesê. Hy het bygevoeg dat die ouer mense te bang was om deur die dak te klim en het op die tweede vlak gebly.
Die bus het links na die berg se kant gegly en diegene wat deur die dak geklim het, kon teen 'n doringboom opklim om op die rotse te skuil. Nooddienswerkers, wat as gevolg van die hoë watervlak nie by hulle kon uitkom nie, het heeltyd met die buspersoneel in kontak gebly.
"My vrou, Renene het ook van die huis af in kontak met die nooddienste gebly om 'n helikopter uit te stuur."
Die water het uiteindelik teen middernag begin sak. Die ander passasiers kon toe uitklim en nooddienste was in staat om by die toneel uit te kom. Niemand is in die voorval beseer nie.
"Dit was vir almal op die bus 'n traumatiese ervaring, maar ons is dankbaar vir die genade van God dat ons veilig en lewend is," het Garreth gesê.
Klik hier vir verwante artikels:
- Meiringspoort weer oop vir verkeer
- Passasiers veilig na Meiringspoort-nagmerrie
- Opvolg: Bus vasgekeer in Meiringspoort
- Bus steeds vasgekeer in Meiringspoort
- Opvolg: Bus in Meiringspoort vasgekeer
- Bus in Meiringspoort vasgekeer
Die bestuurderskajuit van die bus nadat die watervlak gesak het. Foto's: Liezl van Niekerk
ARTIKEL: HENRICA VELDMAN, GEORGE HERALD JOERNALIS.
'Ons bring jou die nuutste Oudtshoorn, Klein-Karoo nuus'
