Opvolg: 2 winkels in 'n week misdaadteikens

OUDTSHOORN NUUS - Die eienaars van 'n splinternuwe slaghuis was die tweede teiken van inbrake in Jacobsonstraat in 'n week.

Hannes Vermeulen, die eienaar van die nuwe Aandiebrand Vleismark wat hy en sy gesin aan die begin van die jaar geopen het, is Dinsdagoggend omstreeks 04:00 deur die polisie in kennis gestel dat die veiligheidshek en voordeur van die besigheid oopgebreek is. Dit blyk dat 'n voertuig van Suiderkruis Sekuriteit die oopgebreekte deur gesien het toe hulle toevallig verbygery het en die polisie in kennis gestel het.

Vermeulen vertel dat die inbrekers bykans al die verpakte vleis, droëwors, sosaties en hoendervleis uit die vertoonkaste gesteel het. "Ons het 'n groot voorraad voorberei vir Vrydag se aandmark by Schoemanshoek. Hulle het dit omtrent alles gesteel saam met uitsoek vleissnitte wat in die yskaste was. Ek kan nie glo dat hulle hier reg langs die straat die hele deur oopbreek sonder dat iemand hulle sien nie."

Die Vermeulen-gesin is nie net ontsteld oor die vleis wat gesteel is nie, maar ook oor die ontwrigting wat daarmee gepaardgaan. Kliënte wat vroeg Dinsdagoggend wou inkopies doen, moes eers wag totdat die polisie die toneel klaar ondersoek en vingerafdrukke geneem het.

Met die besoek van die Oudtshoorn Courant was die slaghuis nog in wanorde met wors en vleis wat op die vloer rondgestrooi was en speurders was nog besig met die neem van vingerafdrukke. Die beraamde koste van die verlore voorraad en skade aan die perseel beloop meer as R30 000.

Aandiebrand was beveilig met 'n yster roldeur wat voor die glasdeure afrol en gesluit word. Die inbrekers het die spore waarin die deur gly met geweld oopgebuig en daarna die glasdeur oopgedwing. Hulle het verskeie mandjies en vlekvrye staalbakke gebruik om die vleis te verwyder.

Dit was nie die enigste misdaadvoorval in die onmiddelike omgewing nie. Misdadigers het Sondagnag 11 Januarie ook by die besigheidsperssel van Iets Van Alles reg langs Aandiebrand Vleismark toegang verkry en verskeie motors beskadig om radio's te verwyder. Die eienaar van Iets Van Alles, Jaco Bezuidenhout, sê die eienaar van 'n aangrensende winkel het hom omstreeks 21:00 Sondagaand gebel om te sê daar is vreemde mense in sy perseel.

"Toe ek daar kom was die polisie reeds daar. Die diewe het oor die hek geklim en by my karre wat agter die gebou gestaan het ingebreek." Wat hom egter verder ontstel is dat die misdadigers skynbaar net gewag het totdat die polisie weg was voordat hulle weer toegeslaan het.

"Toe ek Maandagoggend oopsluit sien ek hulle het teruggekom en by 'n bussie en een van my stoorplekke ook ingebreek en onder andere 'n motorbattery gesteel. Ek het die besigheid al tien jaar en hier is nog nooit ingebreek nie, dit maak my bekommerd dat mense sommer twee keer in een week in dieselfde omgewing kan inbreek."

Klik hier vir 'n vorige nuusflits.