OUDTSHOORN NUUS - Om 'n skool soos Laerskool Oudtshoorn-Noord, wat reeds 101 jaar bestaan, se naam te verander is nie iets wat ondeurdag en oornag plaasvind nie.
Wanneer die naamsverandering egter 'n nuwe era in die wyse waarop kinders opgevoed word inlei is 'n naamsverandering juis die fisiese en sigbare teken daarvan en byna onafwendbaar. So verduidelik Ronel Huysamen, skoolhoof van die skool wat van vandag af as Laerskool Laurus bekend sal staan.
Sy sê dat naamsveranderinge bloot ter wille van naamsveranderinge nie sinvol is nie, maar dat dit soms nodig is om iets daadwerkliks te doen om 'n nuwe visie bekend te stel.
"Ek en my personeel het die afgelope twee jaar baie hard gewerk om die holistiese behoeftes van leerders te identifiseer en daaraan aandag te gee. Dit het 'n groot verandering in ons benadering en werkswyse teweeg gebring en ons het besef dat ons dit wat binne die skool besig is om te gebeur ook van buite sigbaar te maak."
Terwyl die tradisie van 'n skool wat meer as 'n eeu bestaan baie belangrik is en nie moet verdwyn nie het die tyd nou aangebreek vir 'n naamsverandering.
Volgens Huysamen is die klem op groei en ontwikkeling en daarom is die skool se nuwe wa-pen 'n olyfboom in die oop palm van 'n hand. Die boom en hand word begrens deur 'n lourierkrans wat deur die eeue verbind word met oorwinning en sukses.
Met twee B.Ed-grade agter haar naam sê Huysamen sy het die afgelope twee jaar toe-nemend besef dat daar 'n groot behoefte onder kinders is om aanvaar te word soos hulle is en om toegelaat te word om binne hulle eie vermoëns te groei.
"Akademie en prestasie is belangrik, maar ek het besef dat kinders 'n dringender behoefte aan persoonlike groei het en dat prestasie baie moeilik is as daardie behoefte nie dringend aandag kry nie."
"Ek dink skole verloor uit die oog dat 'n laerskoolkind nog besig is om homself te vind en gevorm word en ons moet seker maak dat daardie proses nie in die groter prentjie verlore raak nie."
Dit is, dink sy, juis die identifisering van daardie behoefte wat daartoe gelei het dat die skool se getalle die afgelope jaar van 220 tot byna 400 gegroei het.
Op 'n vraag waarom die naamsverandering in die middel van die jaar plaasvind sê sy dit is 'n strategiese besluit aangesien die WKOD in Augustus met grootskaalse opknappingswerk ter waarde van miljoene rande by die skool begin. "Dit maak net sin om ons nuwe naam en nuwe beeld reeds in plek te hê wanneer die opknapping begin.
'n Naamsverandering het sekerlik ook finansiële implikasies vir die skool en die ouers en om daardie rede is die skool aktief besig om borge te werf en die gemeenskap te betrek.
"Ons lewe tot 'n groot mate in 'n tyd waar 'n kultuur van ontvang aan die orde van die dag is en ons wil op ons manier daardie kultuur omswaai na een van verdien. Ons leerders en ons gemeenskap moet besef dat ons van ons kant af moet wys wat ons self bereid is om te doen voordat ons, ons hande uithou."
Daar sal ook nie van ouers verwag word om binne die volgende maand nuwe skooldrag aan te skaf nie. "Ons behou byvoorbeeld die grys broeke en wit hemde en sal stelselmatig nuwe baadjies infaseer. As alles goed verloop wil ons graag met die begin van 2017 sien dat al ons leerders in Laurus-drag uitgevat is."
Die afgelope twee jaar het die skool reeds reu-sespronge gemaak om eko-opvoeding te bevorder en 'n buitelug eko-klaskamer word reeds sedert 2015 gebruik en voortdurend verbeter.
Alhoewel die opgradering wat in Augustus begin ook die skool se sportvelde en -bane insluit het die skool op eie inisiatief die aangrensende munisipale tennisbane oorgeneem. Die tennisbane was vir jare in onbruik en het stelselmatig verval en op 'n stadium selfs as oornagplek vir rondlo-pers gedien. Die skool het die bane op eie koste begin opgradeer en omhein tot groot vreugde van die inwoners wat in die omgewing woon.
Laerskool Laurus se nuwe naambord is gister by die skool afgelewer en teen vandag is die naamsverandering amptelik.
ARTIKEL: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein-Karoo nuus'
