OUDTSHOORN NUUS - Behuisingstekorte in Oudtshoorn en oplos-sings daarvoor is deur die Oudtshoorn-munisipaliteit gedokumenteer in wat deur raadslid Johan Fourie, portefeuljeraadslid vir tegniese dienste, beskryf word as die mees nagevorsde en beste oplossing nóg vir die probleem.
Shehaam Sims, Oudtshoorn se waarnemede bestuurder menslike nedersettings, het Dinsdag die plan aan die media voorgehou, maar ook onstellende statistieke en syfers ter tafel gelê. Sims het in haar voorlegging gesê die behuisingswaglys staan op ongeveer 13 000, met een persoon sedert 1967 op die lys.
Vir die persoon wat al 50 jaar wag vir 'n huis is daar nou hoop aangesien die eerste ongeveer 1000 huise toegeken sal word aan mense op die waglys tot en met die begin van die 1990's.
Die plan moet nog voor 'n munisipale raadsitting dien vir bespreking en goedkeuring. Die bal is egter aan die rol en mense se hoop op 'n eie huis is besig om van fondasies af op te staan.
Duisende mense wat as agterplaasbewoners geklassifiseer word, mense wat in oorvol huise en informele nedersettings bly, word as begunstigdes vir die behuisingsplan genoem.
Sims het verduidelik met haar diensaanvaarding op 11 Januarie 2016 het sy 'n baie ontevrede gemeenskap tegemoetgeloop met 'n lang behuisingswaglys en swak gehalte behuising. Sims het ook oop kaarte gespeel oor 'n kontrakteur wat nooit betaal is nie, geen fondse en skamele boumateriaal.
Vir Sims het die realiteit van geen lopende water en toiletgeriewe in informele nedersettings die donker prentjie nog verder verdonker.
Sy en haar span het reeds toegesien dat 97% van die toewysing van R32 miljoen wat intussen beskikbaar gestel is, teen einde Februarie spandeer is aan behuising.
Vir die finansiële jare 2016 tot 2019 is 'n verdere R1 403 miljoen reeds goedgekeur.
Die behuisingsplan maak ook voorsiening
vir mense in die inkomstegroep R3 500 tot
R15 000 per maand.
Vyf areas is vir die 2016/17-finansiële jaar geoormerk. Dit sluit in Rose Valley (966 huise tot en met 2020), Dysselsdorp (200 huise tot en met 2020), De Rust (200 huise tot en met 2020), Bongolethu / Bridgton (1 830 huise se bou, herstel en opgradering tot en met 2018) en Spieskamp (48 huise tot en met 2018 beplan).
Oor beplande behuising oos en wes van die Oudtshoorn Lughawe (6254 Wes en 3250 Oos), het burgemeester Colan Sylvester gesê: "Daar is wel plek om te bou." Hy het bygevoeg: "Ons het nog nie planne om die lughawe te skuif nie."
Bouwerk oos en wes van die lughawe is op die beplanning om in die 2018/19-finansiële boekjaar in aanvang te neem.
Na Dinsdag se perskonferensie is van links: Shehaam Sims (waarnemende bestuurder menslike nedersettings), Johan Fourie (portefeuljeraadslid - tegniese dienste) uitvoerende burgemeester Colan Sylvester en Chris Koch (waarnemende direkteur tegniese dienste). Foto: Christo Vermaak.
ARTIKEL & FOTO: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
