OUDTSHOORN NUUS - Die Hoërskool Môrester se twee toppresteer-ders in die 2016 matriekeksamen, Courtney Ingo (18) en Angeline Hermanus (17), het albei met 'n gemiddelde van 76% geslaag.
Courtney het vier A-simbole en Angeline Hermanus het drie verwerf.
Courtney wat B.Com. aan die Nelson Mandela Metropolitaanse Universiteit in Port Elizabeth gaan studeer het onderskeidings in Besigheidstudies (86%), Engels (83%), Ekonomie (81%) en Lewensoriëntering (80%) behaal.
Hy skryf sy sukses toe aan volgehoue harde werk, 'n goeie ondersteuningsnetwerk van sy ouers en onderwysers en 'n noue verband met sy Hemelse Vader.
Sy gunstelingvak is ekonomie.
Hy is 'n kranige skaakspeler en luister graag musiek, enige soort musiek.
Voorts is hy lief om saketydskrifte te lees.
Angeline, wat sedert gr. 8 by haar ouma, Katrina Jumaar, woon, het A-simbole in Geskiedenis (91%), Engels (82%) en Lewensoriëntering (80%) behaal.
Sy het verwag om goed te slaag sê sy, maar nie gedink dat sy drie onderskeidings sou behaal nie.
"Geskiedenis is my groot liefde en daarom spandeer ek die meeste van my tyd aan die vak. Dit is 'n belangrike vak indien jy van die wêreld en jou land wil leer."
Sy vertel dan ook met trots dat sy die afgelope drie jaar die toppresteerder in die vak was.
Angeline sê sy het nie enige stokperdjies behalwe dat sy daarvan hou om te lees.
Sy is deur die Universiteit van Wes-Kaapland aanvaar om LLB Regte te studeer, maar het nog nie antwoord op haar beursaansoek ontvang nie. Sy het ook nie die nodige geld om by die universiteit te gaan registreer nie en is dit die rede waarom sy nog by die huis is.
Volgens haar probeer die prinsipaal van Môrester "en ander mense" tans om haar te help.
Courtney Ingo
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
