OUDTSHOORN NUUS - Laerskool Laurus het 'n benadering tot onderwys wat op 'n hele aantal vlakke verskil van wat mens in 'n laerskool sou verwag. In die eerste plek, sê skoolhoof Ronel Huysamen, is die skool nie prestasie gedrewe nie.
"Ons het 416 leerders en die fokus op elkeen is om te groei. Dit is vir ons belangrik dat elke leerder in al die verskillende aspekte van sy lewe groei, geestelik, emosioneel, akademies asook op sosiale gebied."
Die skool, wat in die middel van 'n woonbuurt in Oudtshoorn-Noord geleë is spog met 'n groot olyfboord waar die olyfoes jaarliks gebruik word om olyfolie te pars wat ten bate van die skool verkoop word. Elke leerling het ook die geleentheid om met 'n groot verskeidenheid plaasdiere interaksie te hê en ook verantwoordelikheid neem vir hulle versorging.
Dit is ook die skool se verbintenis tot groei van die kind wat die inspirasie was vir die eerste mark en entrepreneursmark wat op 31 Maart en 1 April aangebied word. Met 'n groot verbintenis tot die landbou en eko-opvoeding is die fokus van die mark dan ook grootliks op landbou.
"Dit het ook vir ons as skool nodig geraak om wyer te kyk en te beplan rondom die generering van fondse om ons doelstellings vir ons leerders asook vir ons onderwysers te behaal," sê Huysamen.
Die Groei Saam-markdag fokus op entrepreneurskap en groei binne die landbousektor. Die hoofdoel is om 'n platform te skep waarbinne groei aangemoedig en uitgestal word.
"Een van die belang-rikste doelstellings is om al die verskillende rolspelers, wat ook groei aanmoedig en bevorder binne hierdie belangrike sektor van ons ekonomie, gedurende hierdie ekspo bymekaar te bring," sê Huysamen.
Sy verduidelik dat groei binne die landboubedryf, die besigheidsektor asook binne Laerskool Laurus gefasiliteer en uitgebou kan word as die skool met die onderskeie sektore hande vat.
"Ons beplan om hierdie mark/entrepreneursdag as 'n jaarlikse instelling op die streek se kalender te vestig."
Besoekers aan die skool kan 'n groot verskeidenheid stalletjies, uitstallings en aktiwiteite geniet.
Landboumasjinerie
Voertuie
Vleisprodukte
Deli en wynuitstalling
Kindervermaak
Padstal, leefstyl uitstallings en vars produkte mark
Beesloop
Restaurant en teetuin
Vrydag 31 Maart vanaf 12:00 tot 18:00
Saterdag 1 April vanaf 09:00 tot 17:00.
'Ons bring jou die nuutste Oudtshoorn, Klein Karoo nuus'
