OUDTSHOORN NUUS - Tydens die afwesigheid van parkeerbeamptes het bedelaars en besope karwagte Dinsdag en Woensdag die kans gegryp om motoriste te pla en intimideer.
Verskeie van hulle het op Oudtshoorn se sakekern toegesak toe die nuus versprei het dat die parkeerbeamptes nie op hulle poste is nie.
Die Oudtshoorn Courant het Woensdagmiddag 'n oproep van 'n ontstelde sakeman ontvang nadat 'n vrou met twee klein kindertjies deur 'n besope karwag geteister is en sy en die kinders gestruikel het in hul haas om van die man weg te kom.
ruik het, motoriste lastig val. Dit was opvallend dat daar veral by vrouens aangedring is op geld terwyl mans dadelik na weiering uitgelos is.
Veral een van die 'karwagte' wat voor Shoprite 'diens' doen het gesukkel om "Nee" as 'n antwoord te neem. Hy het ten aanskoue van verskeie ander mense op 'n stadium 'n bejaarde vrou se trollie vasgehou en daarop aangedring om die trollie vir haar verder te neem.
Ten spyte daarvan dat sy herhaaldelik geweier het en haar op 'n stadium bloediglik vererg het, het hy steeds die trollie vasgehou. Hy het dit eers laat gaan toe hy besef daar word foto's geneem.
'n Wetstoepasser wat op daardie stadium oorkant die straat verbygestap het was salig onbewus van die intimidasie van die vrou.
Die vrou was hewig ontsteld en het gesê sy voel magteloos as so iets gebeur. Dieselfde man het kort daarna verhoed dat n vrou wat in haar kar klim die deur kon toemaak. Hy het teen die deur gestaan totdat sy vir hom geld gegee het.
Toe hy met die foto's gekonfronteer is het hy gesê dit is sy werk om die trollies terug te bring na Shoprite. Hy het weggestap toe hy gevra is waarom hy die vrouens nie met rus laat as hulle hom ignoreer of vra om hulle uit te los nie.
Sakemanne met wie die Oudtshoorn Courant gesels het, het gesê dat die parkeerstelsel wel vir sommige mense irriterend was maar "toe hulle hier was, was al die dronkes nie voor my winkel nie en my kliënte is nie gepla nie. As dit in twee dae so lyk, hoe gaan dit teen die naweek hier gaan?"
Oudtshoorn se burgemeester, rdh Wessie van der Westhuizen, het gisteroggend (3 September) die gedrag van mense wat motoriste intimideer ten sterkste veroordeel.
"Daar is spesifieke 'hotspots' waarvan ons weet en ek gee vandag opdrag dat die wetstoepassers daardie dele moet patrolleer en dringend aandag aan die probleem gee." Intussen, sê hy, is die munisipaliteit besig met onderhandelinge en vra inwoners om geduldig te wees totdat die proses gereed is vir implimentasie.
Ongeveer 10 van die amptelike parkeerbeamptes was gister weer op hulle poste. Een van hulle het gesê hulle het vir twee dae nie kom werk nie omdat hulle onseker is oor die toekoms van hulle kontrak. "Ons weet die mense praat met mekaar, maar ons weet nie of ons aangaan of nie, nou werk ons maar eers weer en kyk wat gebeur."
Lees vorige artikels hier:
- Verwarring oor parkeerstelsel
- Parkeerbeamptes weg, bedelaars terug
- Onsekerheid oor parkering in Oudtshoorn
ARTIKEL EN FOTO: HANNES VISSER, OUDTSHOORN COURANT - REDAKTEUR
'Ons bring jou die nuutste Oudtshoorn, Klein-Karoo nuus'
