OUDTSHOORN NUUS - Inwoners wat `n daadwerklike verandering aan hul dorp wil bring, moet nou self die verantwoordelikheid opneem, het die adjunkminister van samewer-kende regering en tradisionele sake, Andries Nel gesê.
`n Inwoner van die dorp wou tydens Maandagoggend se vraag-en-antwoordsessie van die parlementsitting van Nel ver-neem waarom die Demokratiese Alliansie nie in beheer is van die Oudtshoorn-munisipaliteit nie.
"Die DA het `n tussenverkiesing gewen en die ANC het alle hofsake, tot in die hoogste hof verloor," het Johan Grobelaar gesê.
Paneellede het egter wal gegooi teen hierdie en ander, soortgelyke vrae. Die adjunkvoorsitter van die nasionale raad van provinsies, Raseriti Tau, het die groot gehoor gemaan om nie politieke toesprake te lewer nie en eerder op "brood-en-botter-kwessies" te fokus. "Hier is mense wat vanoggend niks kon eet nie en nie `n dak oor hul koppe het nie, laat ons eerder vanoggend na hulle luister," het Tau gevra.
Nel het, in antwoord, gesê dat hy `n trotse ANC-lid is en dat daar ook trotse DA-lede teenwoordig is. "Ons verteenwoordig vandag die nasionale regering en ons gaan nie in party-politieke besprekings betrokke raak nie."
Hy het weer breedvoerig verduidelik dat Pravin Gordhan die dorp besoek het en met inwoners gesels het. Die skare van bykans 3 000 mense het aandagtig geluister terwyl Nel voorgelees het uit Gordhan se daaropvolgende brief aan die speaker, John Stoffels.
In die brief stel Gordhan dat daar "algemene konsensus" was, tydens sy besoek aan Oudtshoorn en gesprekke met inwoners en belanghebbendes, oor die probleme in die dorp, wat insluit:
- politieke en administratiewe instabiliteit
- nie-funksionerende raadstrukture
- onregmatige waarnemende aanstellings in senior posisies
- waterbesoedeling en vullisverwydering en `n algemene ineenstorting van dienslewering aan gemeenskappe
- onregmatige aanstellings van diensverskaffers
- swak kommunikasie met inwoners
- Eskom skuld en die afname in die toerisme-industrie
- Rasse-polarisering in die munisipaliteit en gemeenskappe in die dorp
"Dit is wat die mense van Oudts-hoorn vir ons gesê het," het Nel bygevoeg. Hy het afgesluit met die verduideliking:
"Die pakket is voor die raad geplaas, maar dit is nie op die agenda geplaas op `n manier wat die meerderheid raadslede wou hê nie. Toe stort die vergadering in duie, daar was nie `n kworum nie.
So, ek wil net aan die mense van Oudtshoorn sê: as nasio-nale regering het ons ons woord gestand gedoen, ons het na julle geluister.
Ons het terug gegaan en `n ondersteuningspakket uitgewerk.
Daardie pakket is op die oom-blik voor die raad en ek dink julle moet ook vir die raadslede sê, julle as gemeenskap wil hê dat hierdie pakket moet dien op `n raadsvergadering, aanvaar word sodat ons as nasionale regering saam met die provinsie kan kom om die munisipaliteit te help om hierdie probleme op te los."
ARTIKEL EN FOTO: JACQUES SWART, OUDTSHOORN COURANT JOERNALIS.
'Ons bring jou die nuutste Oudtshoorn, Klein-Karoo nuus'
