SUID-KAAP NUUS - "Ek salueer vandag 'n groot leier. Ons het 'n reus verloor, 'n groot boom het geval."
So het die Wes-Kaapse minister van finansies en voorheen minister van kultuursake en sport, dr. Ivan Meyer, Saterdag in die George-burgersentrum in sy huldeblyk vir die ontslape president van die Wes Kaapse sportkonfederasie, Goliath Munro (58), gesê en namens die Wes-Kaapse kabinet meegevoel met die Munro-fa-milie betuig.
Munro is op 1 Januarie aan kanker oorlede.
Die burgersentrum was volgepak van begrafnisgangers wat van heinde en ver gekom het om hul laaste eer aan Munro te betoon.
Volgens Meyer het Munro nie op sportrade "gesit" nie, maar wel gedien.
"Hy het aan my gesê sport is 'n kultuur en jy kon dit sien hier in die Eden-distrik. Ek het iets van 'n legende geleer," het Meyer gesê.
Die visepresident van Wes-Kaapse sportkonfederasie, JP Naudê, het Munro as 'n sterk leier beskryf. "Hy was vreesloos maar gaaf."
Mveleni Ncula, president van sport en rekreasie, verspreidingsagentskap van die Loteryraad, waarvan Munro lid was, het namens die president van die raad hulde aan Munro gebring. "Hier was 'n man wat aanhou veg het vir gelykheid. Sy nalatenskap is een van beduidende vooruitgang in die Wes-Kaap."
Hy het Munro met die Bybelse Goliat vergelyk, maar die verskil was dat hy nie 'n "reus van terreur" was nie. "Hy het onselfsugtig gegee."
Volgens Abri de Swardt, voorsitter van die Wes-Kaapse sportafrigterskommissie, wat vir 24 jaar saam met Munro gewerk het, was Munro behalwe 'n uitmuntende sportadministrateur ook onderwysman by uitstek.
"Gollie was 'n man wat met sekerheid en diepe nadenke sy saak kon stel. Sy ja was sy ja en sy nee sy nee. Hy was 'n reguit man wat 'n reguit pad geloop het," het De Swardt gesê.
Volgens adv. Lyndon Bouah, hoofdirekteur van die Wes-Kaapse departement kultuursake en sport was Munro "meer as 'n administrateur".
Lionel Esau, onderburgemeester van die Eden-distriksmunisipaliteit en boesemvriend, het Munro as 'n merkwaardige mens beskryf.
"Gollie het nooit sy grassroots vergeet nie en alles wat hy gedoen het, was vir die liefde van kinders om geleenthede vir hulle te skep."
"Hy was 'n werkesel en ten spyte van sy siekte aangehou totdat hy nie meer kon nie."
Munro was volgens Esau 'n groot onderhandelaar om na 1992 eenheid in sport te bewerkstellig en 'n dienaar van sy gemeenskap. Volgens Alex Skosana van Atletiek Suid-Afrika (ASA) het Munro na die hertoelating van Suid-Afrika tot wêreldsport na 1990 die drie fundamentele beginsels van eenheid, ontwikkeling en transformasie voluit nagestreef.
"Ons het 'n groot leier verloor en moet sy voetstappe volg. Hy het met die aflosstok geval en daar moet nou na 'n opvolger gesoek word. Hy het met soveel kennis gesterf."
Volgens hom het Munro se leierskap hom onderskei van ander onderwysleiers. "Hy was toegewyd en daarvoor baklei dat alle kinders aan sport deelneem. Sy betrokkenheid by die Loteryraad het gehelp dat talle skole in die Eden-distrik finansiële hulp kry.
Volgens Johannes Munro was sy broer die familie se trots. Hy was bekend as 'Seun', 'Gollie', 'Boetie' en by baie 'Mielies', vanweë sy altyd breë glimlag. "Ek groet 'n liefdevolle broer."
Hy is op Skuinskraal gebore en die gesin het later na Urbanville verskuif waar hy in die stofstrate grootgeword het.
Hy het hom aan die Onderwyskollege Suid-Kaapland as onderwyser bekwaam, sy onder-wysloopbaan op Knysna begin en was lank prinsipaal van St Mary's Primêr.
Hy word oorleef deur sy vrou, Murial, sy ma, Rosina, drie broers, Henry, Jacobus en Hansie, en twee susters, Katrina en Magdalene.
ARTIKEL: GARNETT WICOMB, OUDTSHOORN COURANT KORRESPONDENT
'Ons bring jou die nuutste Tuinroete, Klein-Karoo, Hessequa nuus'
