OUDTSHOORN NUUS - 'n Trekkerbestuurder van die Oudtshoorn-munisipaliteit, Aubrey Rala, het hom (Louis de Villiers) meegedeel dat hy op 19 Oktober 2011 opdrag van die twee beskuldigdes gekry het om sand en klip van die munisipale depot op Dysselsdorp na die woning van die voormalige burgemeester, Gordon April, in Bimraystraat te neem.
So het Louis de Villiers, wat toe as voorman by die depot waargeneem het, dié week in die Oudtshoorn-streekhof in die sogenaamde sand-en-klip-diefstalsaak teen April en Ramond Wagenaar, assistent-superintendent: strate en stormwater, getuig.
“Ek het self gaan kyk en gesien hoedat werkers besig was om op die sypaadjie en op die erf 'n sementblad te gooi,” het De Villiers getuig.
April het hom glo ook meegedeel dat hy die werk self laat doen, “omdat die munisipaliteit te lank neem”.
Harold Lekay, bestuurder: reinigingsdienste by die munisipaliteit, het getuig dat iemand hom op Sondag 23 Oktober 2011 geskakel en meegedeel het dat Rala sand en klip na die woning van April aanry.
Rala het hom die volgende dag ingelig dat hy eers by Wagenaar en daarna by April opdrag gegee het om die sand en klip te ry.
Volgens hom het Rala “geviktimiseerd” gevoel.
April het hom glo ook opdrag gegee om nog sand in die rivier te gaan haal omdat daar nie meer sand by die munisipale depot was nie.
Lekay het getuig dat dit onwettig is om munisipale voertuie vir privaat werk te gebruik.
Volgens die twee beskuldigdes se regsverteenwoordiger, Vaughn Shone, sal hulle getuig dat dit “oorskiet” sand en klip was wat na die huis van April geneem is.
Jean Cox, bestuurder: strate en stormwater van die Oudtshoorn-munisipaliteit, het in sy getuienis breedvoerig verduidelik wat die prosedure is vir werk aan 'n sypaadjie voor jou huis en dat April dit nie gevolg het nie.
Hy het erken dat die instandhouding van die sypaadjie voor 'n inwoner se hek die munisipaliteit se plig is.
“Wanneer 'n hek egter verskuif word is dit die plig van die huiseienaar om vir die koste te betaal.”
Die hof het Dinsdagoggend 'n ter plaatse ondersoek by die woning van April op Dysselsdorp gedoen.
April en Wagenaar staan tereg op vyf aanklagte van diefstal en een van onwettige gebruik van 'n munisipale voertuig terwyl April ook aangekla word van regsverydeling en intimidasie.
Die saak dien voor streeklanddros Mark van Wyngaardt en Tommy Verreyne is die aanklaer.
Klik hier vir vorige artikels:
- Voormalige burgemeester vrygespreek
- Administrateur steek stokkie voor regskoste
- Sand-en-klip-diefstalsaak weer uitgestel
- Nuwe prokureur in sand-en-klip-saak
- Twis oor April se regskoste draai in hof
- Munisipaliteit betaal nie verdere regskostes
- Opvolg: Oud-burgemeester in hof
- Burgemeester se sand en klip verhoor begin
- Oudtshoorn burgemeester in hof
ARTIKEL: GARNETT WICOMB
'Ons bring jou die nuutste Oudtshoorn, Klein Karoo nuus'
