OUDTSHOORN NUUS - Die uitvoerende burgemeester van Oudtshoorn, rdh Colan Sylvester, het vanoggend tydens ‘n ontbyt die top drie matrieks van elk van die skole in die Oudtshoorn-omgewing gelukgewens met hulle prestasies.
Veertien van die toppresteerders van 2016 het die ontbyt bygewoon.
‘n Aantal genooides kon nie die geleentheid bywoon nie aangesien hulle uitstedig is om onder andere met studies te begin.
Tydens die geleentheid by Headlines Restaurant in Baron van Reedestraat, het die burgemeester die presteerders gelukgewens, maar ook ernstig daarop gewys dat matriek die eerste groot bousteen is wat gelê is.
“Hierdie rots wat julle gelê het is die eerste een in die oorgang na volwassenheid en van julle toekoms. Wat jy van hier af vorentoe gaan doen gaan bepaal wat jou nalatenskap eendag sal wees.”
Hy het hulle voorspoed toegewens met hulle toekomsplanne en bygevoeg “Onthou, die aflosstok van die lewe is nou aan julle oorhandig, wat julle darmee maak hang nou van julle af.”
Die onderburgemeester, speaker en verskeie raadslede sowel as onderwysers en ouers het ook die ontbyt bygewoon.
Tydens die ontbyt.
Die leerders wat deel was van die ontbyt.
ARTIKEL & FOTO'S: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein Karoo nuus'
