OUDTSHOORN NUUS - 'n Duitse toeris wat saam met haar man op 'n Harley Davidson was, is hospitaal toe geneem met 'n beenbesering nadat hulle skuins voor 13:00 vanmiddag in 'n botsing met 'n bakkie betrokke was.
Die botsing het op die Mosselbaaipad sowat 800m na die afdraai na Highgate gebeur.
Die paartjie is deel van 'n groep van ongeveer 30 van Munich wat met gehuurde Harleys deur die land toer. Volgens die man het hy sy flikker na regs aangesit om oorkant die pad stil te hou vir foto's toe die bakkie wat van agter gekom het hulle getref het.
Die geskokte bakkiebestuurder het op die toneel gesê hy het die motorfiets begin verbysteek omdat hulle baie stadig gery het.
Volgens hom het hy glad nie die flikkerlig gesien nie, en toe hy amper by hulle was het hulle begin draai. Hy het op die regterskouer van die pad gegaan om hulle te vermy, maar die regterkant van die motorfiets met die bakkie se linkerkant getref.
Paramedici het die vrou hospitaal toe geneem vir x-strale. Die eienaar en personeel van Mooiplaas, waar die groep tuisgaan was ook op die toneel om hulp te verleen.
'n Beampte op die ongelukstoneel.
Die beseerde vrou word is na die hospitaal geneem.
ARTIKEL EN FOTO'S: HANNES VISSER, OUDTSHOORN COURANT - REDAKTEUR
'Ons bring jou die nuutste Oudtshoorn, Klein-Karoo nuus'
