OUDTSHOORN NUUS - Die Oudtshoorn-munisipaliteit het die eerste stap geneem in hul verbintenis tot die nasionale regering se Back to Basics- program.
Volgens 'n mediaverklaring wat hierdie week deur die kommunikasie- en mediabeampte van die munisipaliteit, Ntobeko Mangqwengqwe, uitgestuur is het die onderskeie afdelings- en se-nior bestuurders van die munisipaliteit tydens 'n drie-dag strategiese sessie onderneem om die ekstra myl ten opsigte van dienslewering te loop.
"Ongeveer 50 senior amptenare wat toesighouers, bestuurders en direkteure van die munisipaliteit insluit, het byeengekom en hulle bydrae tot die Back to Basics-program bespreek," lui 'n deel van die verklaring.
Die werksessie, onder voorsitterskap van die waarnemende munisipale bestuurder, Ronnie Lottering, het onder andere kwessies soos voorsieningskanaal (supply chain) prosesse, operasie skoon oudit, begrotingsbeplanning, kostebesparing, kliëntediens en dienslewering in die algemeen.
Volgens Mangqwengqwe het 'n onlangse verslag van die department van samewerkende regering en tradisionele sake (COGTA) oor 278 munisipaliteite gewys dat daar nog 'n lang pad voorlê voordat die land se munisipaliteite aan die verwagtinge van mense voldoen.
Een van die voorwaardes van die Back to Basics-program behels dat die munisipaliteit op 'n maandelikse basis terugvoering moet gee ten opsigte van praktiese stappe wat geneem word om die program in werking te stel.
Van die verslae behels maandelikse terugvoer oor raadsaktiwiteite soos byvoorbeeld raadsvergaderings, finansiële bestuur en aanmelding van alle voorvalle waar bedrog of korrupsie voorkom sowel as tugstappe wat geneem word teen oortreders.
Daar moet ook maandeliks verslag gedoen word oor inkomste en invorderings.
dienslewering en die uitgawe op die kapitale begroting sowel as die aantal kragonderbrekings wat voorgekom het en hoe lank die herstel van die diens geneem het.
Die munisipaliteit moet ook maandeliks kan verslag lewer oor rioolprobleme, agterstand in behuising, onderhoud van paaie en verskeie ander dienste.
Die werksessie is deur die fasiliteerder, dr. William Murray, 'n opvoedingskonsultant, as 'n groot sukses bestempel.
Bestuurders, senior bestuurders en direkteure was deel van die bykans 50 munisipale amptenare wat die strategiese werksessie bygewoon het.
'Ons bring jou die nuutste Oudtshoorn, Klein-Karoo nuus'
