SUID-KAAP NUUS - Gedeeltes van die Tuinroete is Donderdag-oggend deur die Wes-Kaapse provinsie as rampgebied verklaar.
'n Reusebrand wat Dinsdag begin het, het groot dele van Knysna, Sedgefield en Plettenbergbaai in puin gelê.
Op hierdie stadium is die aanduiding dat ongeveer 50 huise in die informele nedersetting en ander woonbuurte in Knysna afgebrand het. 'n Jong egpaar en hul seun het in die brand in Rheenendal omgekom. Donderdagoggend is die liggaam van 'n vierjarige meisie deur haar pa in Welbedacht gevind, en 'n bejaarde man het in Brenton gesterf na hy 'n hartaanval gehad het. Dit bring die dodetal op vyf.
Duisende ander moes Woensdagaand hul huise ontruim - baie van dié inwoners was gister teen saktyd nog nie seker of hul wonings in die brand verwoes is nie.
Die meeste skade is in Belvidere, Knysna Heights, Brenton-on-Lake en Pezula aangerig. Gerugte van skole wat afgebrand of skade gely het kon nog nie bevestig word nie.
Hannes Visser, die redakteur van die Oudts-hoorn Courant het Knysna Donderdag besoek.
"Hier het vanoggend 'n lekker reënbui uitgesak. 'n Stormsterk wind waai steeds, maar die brand hier in Knysna self is nie meer so erg nie. Dit smeul egter nog in groot dele van die dorp. Dit blyk dat die brand gisteraand (Woensdag-aand) berglangs na Plettenbergbaai versprei het," het hy gesê.
Hy het 'n vrou van Oudtshoorn teëgekom wie se huis in Knysna afgebrand het. Vibeke Dugmore, wat by die Klein Karoo Agri se internasionale leerbemarkingsafdeling werk, sou aan die einde van die maand na Knysna verhuis. Sy moes Donderdagoggend tot haar skok uitvind dat haar droomhuis afgebrand het.
Sy is Donderdagoggend per telefoon by haar kantoor in kennis gestel dat haar huis in die slag gebly het. Sy het toevallig saam met joernaliste van die George Herald en Oudtshoorn Courant by die afgebrande huis aangekom.
Volgens Dugmore het sy haar werk bedank om aan die einde van die maand 'n nuwe lewe in Knysna te begin. Sy was te ontsteld op die toneel om verder uit te wei oor haar onmiddellike planne.
Visser sê die tonele in Knysna is onbeskryflik. "In sommige strate in Knysna Heights en Paradise het vier of vyf huise langs mekaar afgebrand. Uitgebrande motors staan nog in afgebrande motorhuise."
Die mediaspan van Group Editors wat die tonele besoek het, is stomgeslaan oor die omvang van die skade.
Volgens die Oudtshoorn Courant se susterkoerant, Knysna Plett Herald, het die Suid-Afrikaanse Nasionale Weermag Donderdag ingespring om plaaslike brandbestryders te help om die brande te help blus.
Sers. Chris Spies, polisiewoordvoerder, het gesê pasiënte is Donderdagaand uit die Knysna-hospitaal ontruim en word in Loerie Park versorg. Hy het ook gevra dat hawelose persone aanmeld by gemeenskapsentrums in Chris Hani, Kayalethu en Loerie Park, en ook agter Mitchell's Brouery.
Honderde individue en organisasies van Oudtshoorn het hul harte oopgemaak om kritiese benodigdhede aan brandslagoffers te skenk.
Die eerste skenking het Donderdag van 'n 14-jarige seun gekom. Seth MacRae het Woensdagaand sy ma Henriëtte gebel en gevra om sy sakgeld van volgende maand vir die slagoffers te gee. "Hy gaan in Bloemfontein skool en sy hart was stukkend oor Knysna se mense.
Hy het dadelik gevra dat ek sy sakgeld van R500 moet skenk," het sy vertel.
Intussen is bokse en sakke vol komberse, toiletware en klere by die Oudtshoorn Courant se kantore afgelewer wat deur Round Table Oudtshoorn na George geneem word.
Zelda du Preez van Round Table sê hulle het ook 'n afsetpunt in Mosselbaai by die Shell-vulstasie.
"Ons vragmotors gaan op 'n gereelde basis deurry George toe om die skenkings af te lewer. Enigiemand wat skenkings wil maak, kan ons kontak," het sy gesê.
Corné Fourie, mede-eienaar by die Santé Fé Spur op Oudtshoorn is ook Donderdag Knysna toe. "Ons en die Spur in Knysna maak kos wat ons aan die brandslagoffers gaan skenk," het hy gesê.
Colleen Smith van Oudsthoorn Dogs in Need het ook met ekstra honde- en katkos, leibande en komberse vir die diere by die DBV deurgery. Volgens haar is daar 'n groot nood wat die diere betref en is alle skenkings vir kos vir die diere en komberse ook welkom.
Huidige afsetpunte vir skenkings is die Oudtshoorn Courant-kantore, Deon Bosman se karwassery by Pick n Pay, Turnberry Boutique Hotel en Plaspac.
Persone wat geskakel kan word:
- Zelda du Preez (Round Table Oudtshoorn. Hulle hanteer ook finansiële donasies): 071 1334 7748
- Hester Grint: 084 811 1936
- Liezl van Niekerk (Oudtshoorn Courant): 084 825 0432
- Plaspac (hulle is ook bereid om te help met vervoer): 044 272 5633
Gerhard Otto van Eden-rampbestuur het gevra dat alle skenkings by die Eden-brandweerstasie in George afgelewer word.
"Ons probeer die verkeer op die paaie beperk en daarom vra ons dat mense die skenkings by die brandweerstasie aflewer. Ons sal dit vandaar na Knysna en Plettenbergbaai versprei," het hy gesê.
Eden-rampbestuur kan by 044 803 1435 of 044 805 5001 geskakel word. Brande kan by 044 801 6311 aangemeld word.
Klik hier vir vorige artikels:
- Knysna fires: Helen Zille visits area
- Update on Plett fire situation
- Knysna fire chief says fires still not under control
- 20 Knysna emergency centres up and running
- Rheenendal suffers furiuous fire, bands together
- Donations for fire victims
- Knysna fires: Mopping up begins
- 3 killed in Knysna fire: Pretoria woman speaks out
- Fires in Plettenberg Bay
- Knysna on fire
- Knysna fires are 'out of control'
- Weather wreaks havoc
Een van die luukse-huise in Knysna Heights wat tot op die grond afgebrand het. Foto's: Hannes Visser
Tot op die grond afgebrand.
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Klein Karoo, Tuinroete, Hessequa nuus'
