DE RUST NUUS - Ongeveer 200 inwoners van De Rust het verlede Donderdag ‘n dringende vergadering oor die waterkrisis in dié dorp bygewoon.
Die munisipale bestuurder van Oudtshoorn, Allen Paulse, het tydens die vergadering gesê dat die watertekort vroeg vandeesweek opgelos behoort te wees mits daar nie weer swaar reën uitsak en opdrifsels weer in die sisteem beland nie.
Paulse het die inwoners gevra om geduldig te wees en ook om verskoning gevra dat die vergadering eers verlede week plaasgevind het.
Volgens hom het die Wes-Kaapse regering en Eden-distriksmunisipaliteit twee groot watertrokke met 'n totale kapasiteit van 22 000 liter aan die Oudtshoorn-munisipaliteit beskikbaar gestel.
Dit sal saam met die twee watertenkwaens, van die munisipaliteit, ingespan word om drinkwater aan inwoners te voorsien.
Inwoners sal vroegtydig in kennis gestel word wanner die watertrokke in hul onderskeie strate sal wees sodat niemand benadeel word nie.
Paulse het ook aangekondig dat 60 000 liter gebottelde water, afkomstig van die inwoners van Citrusdal, vandag op De Rust afgelewer sal word.
Volgens hom moet die watertoevoerpyp vervang word, en kundiges sal op 'n voltydse basis op De Rust en Dysselsdorp geplaas word. "Dit is krities," het Paulse gesê.
Die pompe wat water aan De Rust verskaf, het volgens 'n verklaring van die munisipaliteit, egter Vrydagnag wéér verstop en daar was oor die naweek steeds 'n watertekort.
Inwoners tydens die vergadering.
Klik hier vir vorige artikels:
- Opvolg: Waterkrisis in De Rust
- Skenkingswater stroom na De Rust
- Vergadering in De Rust oor water
- Museum help De Rust met water
- Shoprite skenk water vir De Rust
- Skenk water vir De Rust
- Opvolg: Water vir De Rust
- Opvolg: Waterkrisis in De Rust
- Waterprobleme op De Rust
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoor, Klein Karoo nuus'
