OUDTSHOORN NUUS - Onder groot protes van die DA se opposisiepartye, moes Oudtshoorn se burgemeester, Colan Sylvester, Vrydag 31 Maart die konsepbegroting ter tafel lê.
Chaos het uitgebars toe mense vanuit die gehoor die speaker en burgemeester probeer stilmaak het. So ook het Sarco en Icosa se Gavin Juthe en Vlancio Donson na die DA verwys as 'bedrog'. Juthe het aan die speaker gesê hy wil dit op rekord plaas dat hy 'n klag van bedrog teen die burgemeester aanhangig gaan maak oor die konsepbegroting.
Sylvester het egter te midde van verbale aanvalle en oproer in die raadsaal, voortgegaan met sy konsepbegrotingsrede. Dié konsepbegroting lê nou vir 'n tydperk van twee maande ter insae vir die hele gemeenskap, om kommentaar en voorstelle te lewer, daarna sal die finale begro-ting opgestel word vir voorlegging.
In 'n poging om munisipale-dienslewering in Oudtshoorn uit te balanseer met 'n bekostigbare finansiële herstelplan, het uitvoerende burgemeester, Colan Sylvester, Vrydag in sy jaarlikse konsepbegrotingstoespraak die noodsaaklike verhogings in diensleweringstariewe voorgehou.
Hy het die verhoogde tariewe as noodsaaklik beskryf.
- Elektrisiteit: 3,88%
- Water: Tussen 6,8 en 11,4% (afhangende van die verbruik)
- Riool: 10,4%
- Water infrastruktuur: R9,07 miljoen
- Elektrisiteit: R6,83 miljoen
- Sanitasie: R2,19 miljoen
- Vullisverwydering: R3,95 miljoen
- Padinfrastruktuur: R5,01 miljoen
- Sport en rekreasie fasiliteite: R7,52 miljoen
Die kapitale begroting word hoofsaaklik deur die nasionale regering befonds ten bedrae van R29,88 miljoen. Die res van dié begroting (R6,59 miljoen) word uit die munisipaliteit se eie begroting finansier.
Die bedryfsbegroting vir die boekjaar 2017/2018 beloop R670,25 miljoen, wat 'n toename van R90,2 miljoen toon.
ARTIKEL: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
