OUDTSHOORN NUUS - Ratifiseer, nie rectify nie, was die antwoord wat speaker, Chris Macpherson aan die voormalige onderburgemeester, Vlancio Donson gegee het.
Donson wou by verlede Vrydag se raadsvergadering weet waarom die begroting, wat deur die voormalige burgemeester, Gordon April ingedien is, na die Wes-Kaapse regering verwys moet word om reggestel te word. Donson het gevra wat 'ratifisering' beteken.
Macpherson het verduidelik dat die raad in gebreke gebly het om `n begroting teen die verlangde datum goed te keur. Die begroting, met voorgestelde wysigings, is verlede Vrydag deur die raad aanvaar.
Die Wes-Kaap regering het intussen beheer van die dorp se finansies geneem en `n begroting moet dus eers weer voorgelê word vir goedkeuring waarna dit aan die raad terugbesorg kan word.
Volgens die begroting kan inwoners `n toename van 12,69% in elektrisiteitskostes te wagte wees, `n 8,5% toename in vullisverwydering en 7,25% meer vir water.
Die DA se voorgestelde wysigings aan die begroting sluit in:
- dat algemene uitgawes verminder word met R2,95 miljoen;
- dat residensiële eiendomsbelasting met 0,25% verminder word na 7%;
- dat die voorsiening vir sosiale bystand gesentraliseer word onder die kantoor van die burgemeester, dat dit verminder word na R350 000 en dat die beskrywing verander word na Burgemeestersprojekte;
- dat kalenderdae vir vierings beperk word tot sewe;
- dat alle dupliserings op die begroting verwyder word.
Die DA se Johan Fourie het ook gevra dat 'n dringende ondersoek gelas word om vas te stel of die munisipaliteit wel bankrot is. Indien dit wel die geval is, het Fourie gesê dat die DA/Cope-raadslede hul werk teen `n verminderde salaris sal verrig.
ARTIKEL: JACQUES SWART, OUDTSHOORN COURANT - JOERNALIS.
'Ons bring jou die nuutste Oudtshoorn, Klein-Karoo nuus'
