OUDTSHOORN NUUS - 'n Man van Volmoed, wat sy eie niggie verkrag het, is in die Oudtshoorn-streekhof tot agt jaar gevangenisstraf gevonnis nadat hy skuldig gepleit het.

Die 18-jarige man het in 'n pleitverduideliking erken dat hy sy 17-jarige niggie verkrag het nadat hulle saam met vriende gedrink het.

Volgens hom het hy sy niggie genooi om saam met hom na ’n buitegebou te gaan waar hulle gevry het.

Sy het geweier toe hy haar om seks gevra het en hy het hom op haar afgeforseer en sonder toestemming geslagsgemeenskap met haar gehad.

Hy het erken dat hy verkeerd gedoen en gestraf moet word.

Die klaer sê in 'n slagofferverslag dat sy nie haat teenoor haar neef koester nie, maar dat sy seergemaak en vernederd voel, juis omdat dit al voorheen met haar gebeur het.

Streeklanddros Daniël Boks het in ag geneem dat die man skuldig gepleit het en het afgewyk van die voorgeskrewe vonnis vir verkragting.

Hy is ook onbevoeg verklaar om 'n vuurwapen te besit.

'Ons bring jou die nuutste Oudtshoorn, Klein Karoo nuus'