OUDTSHOORN NUUS - Vier adjunkbalju's van Oudtshoorn moet op 26 Julie in die hof verskyn op aanklagte van bedrog, vervalsing en meineed.
Die klagtes is teen al vier gelê en hulle verskyn afsonderlik. Die klagtes spruit voort uit voorvalle waar die vier na bewering verskeie dagvaardings afgelewer het, maar dit nie persoonlik aan die betrokke persone, soos wat vereis word, beteken het nie. Die klagtes is reeds in November en Desember 2016 gelê.
Die Oudtshoorn Courant het van die klagtes bewus geword toe 'n inwoner dit onder die koe-rant se aandag gebring het dat 'n dagvaarding by sy werk afgelewer is en dat hy glad nie daarvan bewus was nie en nie daarvoor geteken het nie. Hy het toevallig gehoor dat hy in die hof moes verskyn.
Tydens die Oudtshoorn Courant se navrae het 'n persoon wat een van die klagtes gelê het vertel wat in sy geval gebeur het. Volgens hom het sy huishulp 'n dagvaarding oor 'n verkeersboete aan hom gegee wat iemand van die balju se kantoor afgelewer het en waarvoor sy geweier het om te teken.
"Sy het vir die man verduidelik dat sy nie vir enigiets mag teken nie en vir hom verduidelik waar my werk is. Volgens haar het hy egter gesê hy lewer die stuk af by die adres wat daarop verskyn en die brief by haar gelos," het die klaer hierdie week vertel.
Volgens die persoon het hy gewag vir die hofdatum wat op die dagvaarding verskyn en op die betrokke dag by die hof gaan navraag doen en vasgestel dat sy saak op die rol is. Hy het toe gesien dat die handtekening wat op die relaas verskyn as bewys dat hy die dagvaarding ontvang het, vervals is.
Die saak is by die polisie aangemeld en daar is na ander gevalle gekyk om te bepaal of dit 'n geïsoleerde voorval was. Volgens betroubare inligting blyk dit egter dat daar 'n hele paar soortgelyke voorvalle was.
Volgens die inligting wat bekom is blyk dit dat dagvaardings wat afgelewer word wederregtelik gedoen word op die volgende wyses:
- Die dagvaarding word by enigiemand by die adres afgelewer en die handtekening van die persoon wat dit moes ontvang, word vervals.
- n Derde party teken wel vir die dagvaarding (byvoorbeeld 'n huishulp of sekerheidswag), maar die handtekening word dan voorgehou as dié van die persoon wat die dokument regmatig moes ontvang.
- In gevalle waar die persoon, teen wie die dagvaarding uitgereik is, weier om daarvoor te teken moet die balju 'n beëdigde verklaring aflê waarin dit bevestig word. Dit het aan die lig gekom dat sulke beëdigde verklarings glo afgelê word sonder dat daar met die betrokke persone gepraat is en sonder dat hulle die geleentheid gegun is om daarvoor te teken.
Kaptein Louis Visser, woordvoerder van die Oudtshoorn-polisie, het bevestig dat klagtes van bedrog, vervalsing en meineed teen die vier persone gelê is. Hulle name mag nie bekend gemaak word voordat hulle in die hof verskyn het nie.
By navraag het Oudtshoorn se balju, Reginald Cupido, gesê hy is bewus van die klagtes en dat dit tussen die betrokke adjunkbalju's en die ondersoekbeampte hanteer word.
'Ons bring jou die nuutste Oudtshoorn, Klein Karoo nuus'
