OUDTSHOORN NUUS - Sedert hul magsoorname in Oudtshoorn, het samewerking tussen die raad en die provinsiale departement van plaaslike regering aansienlik verbeter. Dit is die mening van Anton Bredell, Wes-Kaapse minister van plaaslike regering, omgewingsake en ontwikkelingsbeplanning.
Bredell het die munisipaliteit die week geluk gewens met die vordering wat reeds gemaak is.
"Die Oudtshoorn-raad het 'n 100-dag-omkeerplan geformuleer wat as riglyn dien. Uitstekende vordering is reeds gemaak met talle van die probleme wat geïdentifiseer is."
• Skoonmaak van stormwaterdreinering asook om probleemareas waar vloede mag voorkom te identifiseer
• Uitdagings met straatligte aan te spreek
• 'n Ooreenkoms te bereik met Eskom asook die konstruksiegroep Asla en die versekering dat maandelikse rekeninge betaal sal word
• Skuldinvordering
• 'n Oudit van voorafbetaalde elektrisiteitsmeters om wanbetaling na te speur
• Die opstel van 'n langtermyn finansiële plan
• Identifiseer areas vir toekomstige behuisingsontwikkeling
• Beplanning vir die konstruksie van publieke toiletfasiliteite vir toeriste en busgroepe
Bredell het ook gesê dat administrateurs die raad bygestaan het met finansiering vir munisipale infrastruktuur. "Die tartanbaan by die De Jager-sportkompleks sal opgradeer word en 'n waterpyplyn vir die Dysselsdorp-sportterrein sal geïnstalleer word. Die projekte het reeds tot werkskepping bygedra."
Bredell sê dat die raad, onder toesig van die administrateur, Kamalasan Chetty, nou op die pad herstel is. "Gereelde vergaderings word gehou, ouditkomitees, wykskomitees en dissiplinêre komitees is gestig en spesiale komitees om die toekoms van die Kango-grotte, ekonomiese ontwikkeling en sosiale ontwikkeling van die dorp aan te spreek is ook in die lewe geroep. Ons is vol vertroue in die spoedige herstel en omkeer van die juweel van die Karoo."
Klik hier vir 'n vorige artikel.
ARTIKEL: JACQUES SWART, OUDTSHOORN COURANT-JOERNALIS
'Ons bring jou die nuutste Oudtshoorn, Klein-Karoo nuus'
