OUDTSHOORN NUUS - Calitzdorp staan nie verniet bekend as Suid-Afrika se porthoofstad nie. Tydens die afgelope CAPPA port- en wynkompetisie wat op 27 Mei plaasgevind het, het vyf wynkelders van Calitzdorp toekennings ontvang.
Behalwe vir die onderskeie toekennings het die vyf se wyne nege plekke uit die kompetisie se toptien ingeneem,
'n Kaapse port van Boplaas Familie Win-gerde was vanjaar se algehele wenner in die Kaapse Port Produsente Vereniging (CAPPA) se jaarlikse port- en wynkompetisie, terwyl nog 'n Boplaas port die tweede plek ingeneem het.
Vanjaar se algehele wenner was Boplaas se Cape Tawny Reserve Bin 1880 (ook die wenner van die Cape Tawny-afdeling), terwyl die Boplaas Cape Vintage Reserve Port 2013 (ook die wenner van die Cape Vintage- afdeling) tweede was.
In die Cape Vintage-klas is altesaam 6 goue medaljes toegeken, wat op die hoë gehalte van die inskrywings dui. Die medalje-wenners is die Boplaas Cape Vintage Reserve 2013 (wenner), terwyl drie portwyne gesamentlik tweede was, naamlik die Axehill Cape Vintage 2012, die Boplaas Cape Vintage Reserve 2012 en die Peter Bayly Cape Vintage 2010.
Die ander goue medaljes is aan die De Krans Cape Vintage Reserve 2012 en die Badsberg Cape Vintage 2009 toegeken.
Hoewel daar net drie inskrywings was in die Cape Tawny-klas, was die beoordelaars weereens baie beïndruk met die gehalte van die inskrywings. Boplaas se Cape Tawny Reserve Bin 1880 was die wenner, terwyl die KWV Classic Collection Cape Tawny tweede geëindig het.
Die beoordelaars was ook baie opgewonde oor die gehalte van die portwyne in die museum-klas, met die KWV Limited Release Tawny Port 1948 wat as 'n absolute juweel beskou is. Die tweede plek is verower deur die Boplaas Cape Vintage Reserve 2004, terwyl De Krans se Cape Vintage Reserve 2002 en die Peter Bayly Cape Vintage 2005 ook goud los geslaan het.
Die beoordelaars was baie opgewonde oor die groot verbetering in die gehalte van die tafelwyne en versnitte gemaak van die Portuguese kultivars. Boplaas het vier wenwyne in die toptien gehad en De Krans twee. Al tien wenwyne is ingeskryf deur kelders van Calitzdorp wat 'n sterk aanduiding is dat die Calitzdorp-omgewing nie net uitstekend vaar met portwyne nie, maar ook met tafelwyne van Portugese kultivars.
Die beoordeling van CAPPA se 2015- Port- en Wynkompetisie het op 27 Mei by Nederburg plaasgevind. Vyf Kaapse wynmeesters met 'n magdom ondervinding van die proe van port- en tafelwyne was op die paneel. Hulle was Christine Rudman (sameroeper), Winnie Bowman, Meryl Weaver, Raymond Noppe en Colin Frith. Hulle het altesaam 63 wyne en portwyne beoordeel.
- Axehill Machado 2013
- Boplaas Touriga Francesa Family
- Reserve 2012
- Boplaas Touriga Nacional 2014
- Boplaas Tinta Chocolat 2014
- Boplaas Ring of Rocks 2013
- Calitzdorp Wynkelder Touriga
- Nacional 2013
- De Krans Touriga Nacional 2014
- De Krans Tinta Roriz 2013
- Fledge & Co Big Red 2012
- Peter Bayly III 2012
Verwante artikels:
Peter Bayly.
Louis van der Riet van De Krans.
Marqaux Nel van Boplaas.
'Ons bring jou die nuutste Calitzdorp, Klein-Karoo nuus'
