OUDTSHOORN NUUS - Plaaswerkers in die George-munisipale gebied en dele van die Klein-Karoo het die afgelope maand geleentheid gekry om te registreer vir behuising in dorpe in die gebied. Dit sluit werkers op plase in die Klein-Karoo van Herold tot Uniondale in.
"Die George-munisipaliteit beplan om ongeveer 7 000 behuisingsgeleenthede aan persone op die waglys binne die volgende vyf jaar te voorsien indien die regering die nodige finansiering beskikbaar maak," sê Steven Erasmus, direkteur menslike nedersettings, grondsake en beplanning van die George-munisipaliteit.
Registrasiesessies het reeds in Uniondale, Rooirivier Kleuterskool, Eseljaght en Hartebeesrivier plaasgevind, en nog 'n sessie vind op 3 Junie by die St Ancothesa-lokaal op Kammanassie plaas. Die sessie duur van 14:00 tot 18:00.
Volgens Erasmus is daar altesaam 590 plaaswerkers of persone wat op die plase woonagtig is wat op die behuisingsbehoeftedatabasis (waglys) geregistreer is.
"In terme van die Behuisingstoekenningsbeleid moet 'n kwota van nie meer as 7,5% van die geleenthede in 'n behuisingsprojek opsy gesit word vir huishoudings van plaaswerkers en plaasbewoners wat die kern van die huishouding is en in die munisipale gebied woonagtig is," sê Erasmus.
Die voorwaardes is dat hulle ten minste 10 van die afgelope 13 jaar op plase buite die dorpe in die munisipaliteit gewoon het of steeds woon en hulle 55 jaar of ouer is.
Volgens Erasmus word 'n geïntegreerde behuisingsontwikkeling beplan wat onder meer voorsiening sal maak vir lae koste behuisings en behuising vir die middelinkomste groepe binne dieselfde ontwikkeling.
Plaaswerkers kan aansoek doen vir behuising in George, Uniondale, Haarlem, Herold, Hoekwil, Touwsranten of Kleinkrantz.
Daar is ongeveer 17 008 persone op die waglys. "Die munisipaliteit streef daarna om diegene op die waglys vir die interim van 'n gedienste erf te voorsien, waarna huise voorsien sal word sodra die nodige finansiering beskikbaar gemaak word."
Volgens Erasmus word die huise wat tans gebou word in terme van die minimum norme en standaarde van die provinsiale department van menslike nedersettings gebou en het 'n minimum grootte van 40m².
Persone wat op die behuisingsbehoefte-databasis wil registreer moet die volgende dokumente saamneem na die registrasielokaal:
- Identiteitsdokument van aansoeker
- Indien getroud, gade se identiteitsdokument en huweliksertifikaat
- Indien gade gesterf het, sterftesertifikaat
- Indien geskei, egskeidingsbevel en bewys dat kinders in aansoeker se sorg geplaas is
- Indien in 'n saamleefverhouding, u metgesel se identiteitsdokument
- Geboortesertifikate van kinders
- Bewys van inkomste / Werkloosheidsertifikaat
Erasmus beklemtoon dat dit belangrik is om kennis te neem dat die aansoeke slegs geprosesseer kan word indien 'n volledige aansoek ontvang word.
Kontak Petro Botha by 044 801 9085 of petro-b@george.org.za indien werknemers die geleentheid om te registreer misgeloop het, of vir meer inligting oor die projek.
'Ons bring jou die nuutste Oudtshoorn, Klein-Karoo nuus'
