OUDTSHOORN NUUS - Die uitvoer van vars volstruisvleis na Europa is opgeskort na die uitbreking van die hoogs patogene H5N8-virus op hoenderplase by Villiers en Standerton.
Uitvoer van hittebehandelde vleis gaan voort.
Die verbod op uitvoere van vars vleis word gedoen in terme van die World Organisation for Animal Health (OIE) en die Europese Unie se reëls vir handel indien daar 'n hoogs patogene virus in 'n land geïsoleer word. Die verbod sal geld totdat die land weer vry van die virus verklaar kan word.
Omdat die virus vermoedelik deur migrerende wilde voëls oorgedra word is dit nie moontlik om die virus 100% te bekamp nie.
Volstruisboere word versoek om biosekerheidsmaatreëls, soos vervat in die veeartsenykunde-afdeling van die departement van landbou, bosbou en visserye se VPN04, streng toe te pas en alles moontlik te doen om hul volstruise te beskerm.
- Kontak tussen volstruise en watervoëls moet vermy of beperk word.
- Volstruise se drinkwater met gechlorineer word omdat die virus lank in waterbronne kan oorleef.
- Personeel wat met die volstruise werk se oorpakke en skoene/stewels, alle toerusting en voertuie moet deeglik volgens die VPN04 ontsmet word.
- Behoorlike toegangsbeheer moet toegepas word om te voorkom dat besoekers aan die plaas die virus inbring of versprei.
- Geen geval van hoogs patogene H5N8 is nog onder volstruise aangemeld nie, maar omdat daar buite met volstruise geboer word, is daar 'n risiko dat die volstruisbedryf getref kan word.
Dit is nie seker wat die virus se uitwerking op volstruise kan wees nie, maar volstruisboere word versoek om enige simptome van die siekte onmiddellik by 'n privaat veearts, die staatsveearts of die SA Volstruis Sakekamer (SAVBK) aan te meld. Boere moet voedingsinname kontroleer, uitkyk vir groen urine en let op die algemene gesondheid van die volstruise.
Hierdie spesifieke virus het, sover bekend, nog nie mense ernstig siek gemaak nie, maar persone in baie noue kontak met volstruise mag dalk griepsimptome toon wat daarop dui dat hulle die siekte onder lede het.
Volstruise word voor slagting getoets en slegs siektevrye plase kan 'n permit bekom om die volstruise by EU goedgekeurde abattoirs te slag waar baie streng standaarde geld om voedselveiligheid te waarborg.
Vir meer inligting, kontak die SAVBK by 044 272 3336, of per e-pos by info@saobc.co.za
ARTIKEL: TISHA STEYN
'Ons bring jou die nuutste Oudtshoorn, Klein Karoo nuus'
