SUID-KAAP NUUS - Die organiseerders van die Diasfees het besluit om vanjaar ‘n ekstra kultuurbeen by al die ander feesbedrywighede te voeg.
Buiten die gebruiklike kultuurkonsert wat die fees op Donderdag 29 Januarie om 19:30 sal inlei, word daar vanjaar ook twee konserte, een met Emile Minnie en die ander met Zanne Stapelberg, vir klassieke musiekliefhebbers in die Diasmuseum aangebied. Soos in die geval van die res van die fees, is toegang tot hierdie twee konserte gratis.
Die ster van die kabaretverhoog wie se stem as subliem en klavierspel as fenomenaal beskryf word, Emile Minnie, tree op Vrydagaand 30 Januarie om 20:30 in die Diasmuseum op. Dit belowe om ‘n aand van heerlike musiek, pret, en humor te wees. Van Minnie word gesê dat hy die verhoog met sy energie en humor, sang en klavierspel vul.
Die program sal Franse liefdesliedjies soos La Vie En Rose van Edith Piaf, jazznommers soos Cheek to Cheek van Frank Sinatra en goue treffers soos Holding Out for a Hero deur Bonnie Tyler, met dinamiese gehoordeelname, insluit.
Dié konsert begin eers om 20:30 om die publiek die kans te gee om eers by die feesterrein in die Santoskaravaanpark ‘n draai te maak vir die amptelike opening van die fees. Toeskouers sal die verruklike Flying Lions se vertoning in hul Harvards, en daarna die optrede van die Chinese kunstegroep, die Zhejing Opera Wu Arts groep, wat Mosselbaai besoek as deel van hulle wêreldtoer, kan geniet.
Operaster Zanne Stapelberg, begelei deur Elna van der Merwe, tree op Saterdagaand 31 Januarie, om 19:30, in die Diasmuseum op. Sy is al bekroon as Suid-Afrika se beste jong operasangeres, en het in 2014 ‘n KANNA-toekenning vir die beste klassieke produksie by die KKNK ontvang.
Haar konsert, wat al as hipnoties, verleidelik, flikflooiend en bekoorlik beskryf is, sal bestaan uit ‘n mengsel van nuwe Stapelberg-komposisies met liedere uit die opera, musiekblyspelle en kabaret.
Dit sal elemente uit Les Miserables, Karoonag, Maria de Buenos Aires en talle meer bevat. Die gehoor sal met die musiek van Mozart, Piaf, Weil, Amanda Strydom en Nat King Cole bekoor word, musiek wat spreek van straatkafees en operasale.
Aangesien toegang gratis is, sal geen besprekings geneem word om hierdie kunstenaars van wêreldgehalte te sien optree nie.
Zanne Stapelberg
'Ons bring jou die nuutste Tuinroete, Klein-Karoo nuus'
