OUDTSHOORN NUUS - Produksies wat vanjaar by die KKNK geopen het, het Donderdag, 8 Desember die meeste benoemings in die 2017 kykNET Fiëstas ontvang.
Die KKNK produksies het 22 benoemings ontvang en ’n ko-produksie tussen Kunste Onbeperk, die maatskappy wat die KKNK aanbied, en die US Woordfees, het twee benoemings ontvang.
Die Klein Karoo Klassique, wat ook deur Kunste Onbeperk aangebied word, het ook twee nominasies ontvang.
“Ons is geweldig trots op al die kunstenaars, regisseurs en vervaardigers wat vir hulle harde werk by vanjaar se KKNK en Klein Karoo Klassique met ’n kykNET Fiësta-benoeming beloon is.
Om die meeste benoemings onder die feeste te ontvang, is ’n verdere pluimpie en spreek boekdele van die gehalte werk wat feesgangers jaar op jaar in die Klein Karoo te wagte kan wees”, sê Rhodé Snyman, uitvoerende hoof van Kunste Onbeperk.
Van die 22 benoemings is 14 vir drie produksies wat in 2016 deur Kunste Onbeperk vervaardig is: Die musiekblyspel Heidi het ses, die drama Die huis van Bernarda Alba het vyf en die riller, Kul het drie benoemings.
Volgens Naudé van der Merwe, sameroeper van die Fiëstas-paneel, het die paneellede meer as 100 Afrikaanse debuutproduksies gesien. Daar is vanjaar ’n aanpassing gemaak om die musiekkategorieë uit te brei.
“In die musiekkategorieë was daar so ’n groot verskeidenheid dat ons besluit het om die kategorieë aan te pas en ’n wyer net te gooi om sodoende meer erkenning te gee.
Daar is nou een kategorie vir grootskaalse produksies, een vir meer intieme musiekvertonings en een vir musiekvertonings wat ’n duidelike narratief volg”, sê Van der Merwe.
'Ons bring jou die nuutste Oudtshoorn, Klein Karoo nuus'
