OUDTSHOORN NUUS - Vanjaar was die mees uitdagende seisoen, maar ook die mees betekenisvolle een in die geskiedenis van die All Blacks-rugbyklub van Oudtshoorn.
Só het die voorsitter van die klub, Damon Gysman, Saterdagaand tydens die klub se jaarlikse prysuitdeling in die banketsaal in sy jaaroorsig gesê.
"Die klub het vanjaar talle spelers aan die dood afgestaan, maar teen alle verwagtinge dapper in SWD se eersteliga meegeding en met ongelooflike deursettingsvermoë en spanwerk daarin geslaag om die seisoen in die derde plek op die punteleer af te sluit.
"Die seisoen het gevolglik op 'n triom-fantelike noot geëindig met die klub se bevordering tot die Superliga (A) vir 2026."
Kerse is tydens die geleentheid aangesteek ter nagedagtenis aan die ontslape spelers van die klub die afgelope jaar.
Die losvoorspeler, Adion Ntlati, is tydens die glansgeleentheid vereer as die klub se sportman die jaar terwyl EAJ Carew weggestap het met drie toekennings vir meeste drieë, beste agterspeler en speler van die jaar.
Die eerste span is ook as span van die jaar aangewys.
Ander toekennings
• Adian Gentle (beste speler C-span)
• Ruwaal April (beste speler B-span)
• Michael Tyali (beste speler A-span en
spelers se speler van die jaar)
• Johannes Jonathan (mees lojale ondersteuner)
• Naomi Jonkers (mees lojale bestuurslid)
• Llama Kwezi Tyatya (mees lojale speler)
• Roche van Rooyen (mees toegewyd speler)
• Ntahwinne Wolhuter (nuweling van die jaar)
• Howard Goliath en Adion Ntlati (bestevoorspelers)
• Washif September (junior sportman van die jaar)
Belowendste spelers van die jaar
• Kyle Coetzee (A-span)
• Ruwaal April (B-span)
• Gavindhino Pietersen (C-span)
Nuwe bestuur
Die klub se nuwe bestuur vir 2026 is Damon Gysman (voorsitter), Denzil Januarie (ondervoorsitter), Colleen Julius (tesourier), Naomi Jonkers (sekretaresse), Isak Murphy (hulpsekretaris), Arthur Saayman (wedstrydsekretaris), Marodene Manewil (skakelbeampte), Leroy Michaels en Jacobus Manewil (trustees), Clive Le Roux en Mario Jansen (bykomende lede), Marthinus de Bruyn (sameroeper van keurders) en Henry Weyers (hoofafrigter).
‘Ons bring jou die nuutste Tuinroete, Hessequa, Karoo nuus’
