OUDTSHOORN NUUS - Terwyl konflik in die Midde-Ooste internasionale opskrifte haal, het die situasie vir verskeie gesinne uit die Oudtshoorn-streek ’n persoonlike werklikheid geword terwyl hulle steeds in die Verenigde Arabiese Emirate woon en werk.
Susan en Eben White, asook Schalk en Lana Esterhuyse en hul jong kinders, is onder die Oudtshoorn-inwoners wat onlangs veiligheidswaarskuwings en verhoogde sekuriteitsmaatreëls ervaar het ná spanning in die streek.
Die Whites, wat in Abu Dhabi woon, het einde Februarie ’n noodwaarskuwing ontvang wat inwoners aangeraai het om skuiling te soek weens ’n moontlike missielbedreiging. Kort daarna het sirenes regoor die stad afgegaan en verdedigingstelsels is geaktiveer.
Hoewel die voorval skok veroorsaak het, het die daaglikse lewe grotendeels voortgegaan, met sommige skole en werkplekke wat tydelik na aanlyn bedrywighede oorgeskakel het.
Schalk en Lana Esterhuyse en hul jong kinders, Milah en Livia. Foto verskaf
In Dubai het die Esterhuyse-gesin soortgelyke oomblikke van onsekerheid beleef nadat hulle verdedigingstelsels naby hul woongebied hoor aktiveer het. Die gesin het tydelik by vriende ingetrek, terwyl hul kinders tans aanlyn skoolgaan.
Karla Britz Foto verskaf
Nog ’n Oudtshoorn-inwoner, Karla Britz, wat as onderwyser in Koeweit werk, is tans in Istanbul gestrand nadat die lugruim gesluit is. Hoewel sy veilig is, bly die onsekerheid oor haar terugkeer spanningsvol.
Volgens die gesinne speel gemeenskapsondersteuning ’n groot rol om rustigheid te behou, terwyl owerhede inwoners deurgaans met amptelike opdaterings inlig.
Lees meer oor hul ervarings en hoe hulle die onsekere tydperk hanteer in dié week se Oudtshoorn Courant.
‘Ons bring jou die nuutste Tuinroete, Hessequa, Karoo nuus’
