NASIONALE NUUS - Oudtshoorn se eie Mia le Roux, Mej. Suid-Afrika 2024, is deur president Cyril Ramaphosa aangewys as een van 31 vooraanstaande Suid-Afrikaners, of te wel "Eminent Persons Group", om sy beoogde nasionale dialoog af te skop by sy eerste nasionale konferensie daaroor op 15 Augustus.
Die president het gister, 10 Junie die groep se name bekend gemaak na hy sy langverwagte nasionale dialoog vroeër die week amptelik aangekondig het.
Ramaphosa se inisiatief is daarop gemik om Suid-Afrika se toekoms te hervorm te midde van diep sosiale en ekonomiese uitdagings soos toenemende ongelykheid, werkloosheid, misdaad en sistemiese korrupsie.
Die konferensie beoog om leiers van alle Suid-Afrikaanse sektore bymekaar te bring.
Die nasionale dialoog sal nie 'n enkele gebeurtenis wees nie, maar 'n uitgebreide, deelnemende proses wat sal ontvou deur plaaslike konsultasies, sektorale besprekings en provinsiale byeenkomste.
Die eerste konferensie sal die agenda vir die nasionale dialoog bepaal en sal 'n verteenwoordigende byeenkoms wees wat die regering, politieke partye, die burgerlike samelewing, sake, arbeid, tradisionele leiers, godsdienstige leiers, kultuurwerkers, sportorganisasies, vroue, jeug en gemeenskapstemme, onder andere, bymekaarbring.
Volgens Ramaphosa sal die tweede konferensie die land se gedeelde waardes versterk en 'n gemeenskaplike visie en aksieprogram in die toekoms aanneem.
“Daar word verwag dat die nasionale dialoog vordering met ons Visie 2030 sal dryf en die grondslag sal lê vir die volgende fase van Suid-Afrika se nasionale ontwikkelingsplan. Die nasionale dialoog self is nie 'n gebeurtenis nie, maar sal 'n deelnemende proses wees wat in fases ontvou, van plaaslike konsultasies en sektorale betrokkenheid tot provinsiale en nasionale byeenkomste. Ons verwag dat die nasionale konferensie 'n ooreenkoms sal finaliseer wat die rolle en verantwoordelikhede van alle Suid-Afrikaners uiteensit,” het Ramaphosa gesê.
Die 31 lede van die vooraanstaande groep is:
- Dr. Brigalia Bam, voormalige voorsitter van die Onafhanklike Verkiesingskommissie;
- Robbie Brozin, entrepreneur en sakeman;
- Regter Edwin Cameron, voormalige Konstitusionele Hof-regter;
- Manne Dipico, voormalige Noord-Kaapse premier;
- Desiree Ellis, Banyana Banyana-afrigter en sokkerlegende;
- Ela Gandhi, vredesaktivis en staatmaker;
- Prof. Nomboniso Gasa, navorser en landelike aktivis;
- Bobby Godsell, sakeleier;
- John Kani, bekroonde akteur;
- Siya Kolisi, Springbok-kaptein en wêreldkampioen;
- Mia le Roux, Mej. Suid-Afrika 2024;
- Sy Genade Biskop Barnabas Lekganyane, leier van die Zion Christian Church;
- Sy Genade Biskop Engenas Lekganyane, leier van die St. Engenas Zion Christian Church;
- Die Eerwaarde Thabo Makgoba, Anglikaanse Aartsbiskop van Kaapstad;
- Prof. Tinyiko Maluleke, voorsitter van die Nasionale Beplanningskommissie;
- Dr. Barbara Masekela, digter, opvoeder en staatmaker;
- Lindiwe Mazibuko, voormalige LP;
- Roelf Meyer, voormalige minister en grondwetlike onderhandelaar;
- Gcina Mhlope, storieverteller, skrywer en akteur;
- Nompendulo Mkhatshwa, studenteaktivis en voormalige LP;
- Kgothatso Montjane, Grand Slam-tenniskampioen;
- Prof. Harry Ranwedzi Nengwekhulu, voormalige aktivis en opvoedkundige;
- Bheki Ntshalintshali, vakbondlid en voormalige Cosatu-hoofsekretaris;
- Hosi Phylia Nwamitwa, tradisionele leier;
- Kgosi Thabo Seatlholo, voorsitter van die Nasionale Huis van Tradisionele en Khoi-San Leiers;
- Dr. Gloria Serobe, sakeleier;
- Dr. Imtiaz Sooliman, stigter van die Gift of the Givers;
- Prof. Derrick Swartz, akademikus;
- Lorato Trok, skrywer en vroeë geletterdheidskenner;
- Sibusiso Vilane, bergklimmer en avonturier; en
- Siyabulela Xuza, bekroonde vuurpylwetenskaplike.
‘Ons bring jou die nuutste Tuinroete, Hessequa, Karoo nuus’
