NASIONALE NUUS - Olivier Kritzinger (63) van Joubertina in die Langkloof is aangewys as Suid-Afrika se 2016 Boereworskampioen van die jaar.
Kritzinger het verlede week met die louere op Robbeneiland weggeloop na sy wors as die beste aangewys is deur 'n paneel topsjefs.
Die kroning is voorafgegaan deur 'n Sewesrugbywedstryd op die eiland - die eerste rugbywedstryd ooit daar - en SA Sewesvleuel Roscko Speckman het 'n spesiale goue rugbybal deur die pale geskop toe die banier ontbloot is met die wenner se naam daarop.
Benewens die gesogte titel het Kritzinger ook 'n Toyota Hilux Dubbelkajuit 2.8 GD-6 Raider gewen.
Kritzinger is al vir 18 jaar die projekbestuurder van Huis Formosa, 'n tuiste vir bejaardes in Joubertina en het destyds 'n slaghuis begin om die bejaarde huis se skuld af te betaal - iets wat hy in minder as twee jaar kon doen.
Hy het passievol oor boerewors geword nadat hy die slaghuis in 1999 oopgemaak het. "Dit het baie oefening gevat om die wors reg te kry, maar ek het professionele slagters vir raad gevra."
Kritzinger is die eerste Langklower en Oos-Kapenaar wat die kompetisie wen en sê briljante boerewors word bepaal deur 'n paar faktore. "Die vleis en snit, die voorbereiding en natuurlik die speserye en kruie. Boerewors is deel van ons tradisie.
"Dit is heel eerste in Suid-Afrika gemaak so dit gee my groot plesier om 'n bydrae tot die eeue oue tradisie te maak."
Kritzinger het baie energie en hou daarvan om besig te bly. Hy stel intens belang in die geskiedenis van die Langkloof en geniet dit om in sy uitgebreide groentetuin te werk. Hy en sy vrou Anita het drie dogters, Janine, Juanita en Jacoline en vyf kleinseuns.
8 459 km Championship Boerewors verkoop. As mens 15 cm stukkies boerewors gebruik, is dit gelyk aan
56,4 million boereworsrolletjies.
Die ander twee finaliste was Vukile Vincent Cele van Durban en Winter Reaobaka Letlhogile van Kimberley. Al drie finaliste het geskenkpakke van die borge, Coca-Cola, All Gold en Simba ontvang sowel as koopbewyse van Shoprite en Checkers.
Kritzinger se boerewors is reeds beskikbaar by takke van Shoprite, Checkers en Checkers Hyper - net betyds vir Erfenisdag Saterdag 24 September.
'Ons bring jou die nuutste Tuinroete, Klein Karoo, Hessequa nuus'
