Haweloses binnekort gehuisves

OUDTSHOORN NUUS - Na maande se gewag en onsekerheid blyk dit dat sommige haweloses in Oudtshoorn aan die begin van Julie in die nuwe skuiling vir haweloses kan intrek.

Dit volg na die departement van maatskaplike ontwikkeling en die Oudtshoorn-munisipaliteit in Maart vanjaar 'n memorandum van ooreenkoms geteken het om verskeie kwessies rondom haweloses en kinders op straat aan te pak en oplossings te vind.

Die Oudtshoorn Courant het vroeër vanjaar berig dat drie geboue, die Centre of Hope, die Malibongwe-skuiling vir mishandelde vroue en kinders sowel as die ou SAPD-gebou in Dysselsdorp aan maatskaplike dienste oorhandig is.

Dennis Nghonyama, bestuurder van maatskaplike ontwikkeling in Oudtshoorn, het die week gesê dat hulle op 12 Junie 'n werksessie oor die bestuur van die skuiling, die diensverskaffers en die betrokkenheid van die munisipaliteit gehad het.

"Voorbereidings het reeds begin om die eerste haweloses aan die begin van Julie in die Malibongwe-skuiling te laat intrek," het hy gesê.

Volgens hom sal daar volhoubare programme wees waaraan die haweloses kan deelneem sodat hulle weer suksesvol in die samelewing opgeneem kan word.

"Ons het opnames gedoen en gevind dat daar 28 haweloses is. Vyftien van die mense het regtig nie huise nie."

Hy het verder gelas dat daar begroot is dat die Malibongwe-skuiling 10 mense op 'n slag kan huisves.

"Daar is besprekings met die munisipaliteit dat materiaal vir strukture gegee word sodat van hulle wonings kan hê.

Die maksimum tyd-perk wat die mense gehuisves kan word is ses maande op 'n slag en daar moet beduidende redes wees sou hulle langer bly. Party van die mense kan selfs net 'n week of twee bly en soos die haweloses in die samelewing geïntegreer word begin die proses van voor af met nuwe mense wat inkom," verduidelik hy.

Volgens 'n groepie haweloses wat in Vredestraat woon het die departement van maatskap-like dienste reeds met hulle oor die skuiling gesels.

Die groep haweloses het al gegroei en van hulle het selfs skuilings opgerig om hulle teen die gure winterweer te beskerm. Tannie Leen woon meer as 20 jaar op straat en sy het haar een been jare gelede in 'n ongeluk verloor.

"Hulle het so twee maande gelede met ons kom gesels oor die trek na die shelter toe, maar ons het nog niks weer gehoor nie," het sy gesê.

André Strydom sê hy het jare gelede sy tydelike struktuur in 'n brand verloor.

"Sedertdien is ek op straat. As ek net weer werk kan kry. Ek het baie op boupersele gewerk, maar al my dokumente en bewyse is in die brand verwoes. Die munisipaliteit het ook al gesê hulle sal vir ons materiaal gee dat ons weer strukture kan oprig, maar daarvan het niks gekom nie," verduidelik hy.