OUDTSHOORN NUUS - Die Eden-straatmylreeks vir 2025 is Maandagaand, 24 November, by Suzuki Oudtshoorn bekendgestel en amptelik geopen.
Die reeks het vanjaar drie bene met die byvoeging van die George-straatmyl. Volgens Dave van der Walt van KKAF (Klein Karoo Atletiekfonds), beloof vanjaar se reeks om groter te wees as enige van die voriges.
Die reeks vind op 14, 16 en 18 Desember onderskeidelik in George, Oudtshoorn en Hartenbos plaas. Hierdie is die ideale geleentheid vir toeskouers om van die land se beste straatmylatlete in aksie te sien.
Die George-straatmyl vind in Yorkstraat plaas met die eindpunt by Eenheidspark waar Yorkstraat by Courtenaystraat aansluit. Die eerste atlete spring om 09:00 weg.
Die tweede been in Oudtshoorn, die Klein Karoo-straatmyl, begin om 09:00 by Kleinplaas en eindig voor Santa Fé Spur in Baron van Reedestraat.
Volgens Van der Walt is die roetes in George en Oudtshoorn reguit en voorsien hy dat daar 'n aantal sub-vierminute uitslae gaan wees.
Die laaste been, die ATKV-straatmyl in Hartenbos, begin en eindig by die riviermond en die honderde vakansiegangers wat jaarliks atlete op die roete ondersteun, skep 'n wonderlike atmosfeer vir die wedlope.
Meer as R60 000 se prysgeld is op die spel en volgens Van der Walt, is hierdie die grootste straatmylreeks in die land. Van der Walt sê die status van straatmyle binne wêreldatletiek is verhoog deurdat World Athletics dit bygevoeg het tot die nuwe program van die Wêreldpadkampioenskappe wat vir die eerste keer in Latvia aangebied is. Eden-straatmylreeks se wenners, Ryan Mphahlele en Carina Viljoen het daar deelgeneem. Die Eden-straatmylreeks bied aan atlete van SWD die geleentheid om keurders se oog te vang vir opname in die
SA spanne.
Die hoofborge van die straatmylreeks is NWU, ATKV Oorde Hartenbos, Wes-Kaapse departement van kultuursake en sport, Oudtshoorn-munisipaliteit, George-munisipaliteit, Mosselbaai-burgemeesterskantoor en MSEC.
Addisionele borgskappe en bystand word verleen deur Suzuki Oudtshoorn, Surval-olyflandgoed, Kleinplaas, Sante Fe Spur, ASWD, ASICS, TOP GEAR, EdenFM en Jakhals Events Management.
Vir inligting, inskrywings en die volledige program, besoek www.edenmiles.co.za sowel as hulle Facebook-blad.
‘Ons bring jou die nuutste Tuinroete, Hessequa, Karoo nuus’
